कल्याण डोंबिवली महापालिका हद्दीतील अनधिकृत बांधकामे तसेच अतिक्रमण हटविण्यासाठी पोलिसांचा ताफा घेऊन फिरणाऱ्या महापालिकेने त्यासाठी भरावे लागणारे शुल्क मात्र थकविले आहे. ठाणे पोलीस आयुक्तालयाने यासंबंधी महापालिकेस पत्र पाठविले आहे. संरक्षण सेवेची २९ लाख ६४ हजार ७४५ रुपयांची रक्कम महापालिकेने थकविली आहे.
कल्याण डोंबिवली महापालिका हद्दीत मोठय़ा प्रमाणावर अनधिकृत बांधकामे सुरू आहेत. विशेष करून ग्रामीण भागात अशा बांधकामांचे प्रमाण अधिक आहे. या बांधकामांवर कारवाईसाठी पोलिसांचा मोठा ताफा बाळगण्यात आला आहे. शहरात पालिका अधिकारी, लोकप्रतिनिधी यांच्या संगनमताने मोठय़ा प्रमाणावर अनधिकृत बांधकामे सुरू आहेत. फेरीवाल्यांना हटविण्याचे काम काही अधिकारी पोलीस संरक्षण न घेताही करतात. असे असले तरी कारवाई करताना अडचणी निर्माण होऊ नये, यासाठी महापालिकेने पोलिसांचा ताफा बाळगला आहे. शहरातील वाढत्या अनधिकृत बांधकामांवर फारशी कारवाई होताना दिसत नाही. तसेच कल्याण, डोंबिवली अशा दोन्ही रेल्वे स्थानकांना लागून फेरीवाल्यांचे जथ्थेच्या जथ्थे दिसून येतात. याविरोधातही फारशी प्रभावी कारवाई सुरू आहे, असे चित्र दिसत नाही. असे असताना पोलिसांचा ताफा बाळगल्याबद्दल महापालिकेवर लाखो रुपयांच्या थकबाकीचा डोंगर उभा ठाकल्याने आश्चर्य व्यक्त होत आहे. पोलीस संरक्षणासाठी लाखो रुपयांचा खर्च होत असेल, तर अतिक्रमणांविरोधात प्रभावी कारवाईसुद्धा व्हायला हवी, अशी अपेक्षा शहरातील नागरिक व्यक्त करत आहेत.