एलआयसीकडून नवीन वर्षांत दोन नवीन योजनांचा नजराणा

झोनल मॅनेजर्स क्लबचे उद्या अधिवेशन
फ्लेक्सी प्लस व न्यू जीवन निधी अशा दोन योजना एलआयसीने नवीन वर्षांत सुरू केल्या आहेत. पहिली योजना विमा संरक्षणासह पेन्शनची, तर दुसरी आकर्षक युनिक लिंक्ड असल्याची माहिती एलआयसीचे विपणन प्रबंधक डी. एम. मित्तल यांनी दिली. एलआयसीचे विक्री व्यवस्थापक प्रदीप नांदगावकर या वेळी उपस्थित होते.
एलआयसीच्या झोनल मॅनेजर क्लबचे अधिवेशन बुधवारी (दि. ९) येथे आयोजित करण्यात आले आहे. तब्बल ९ वर्षांनी औरंगाबाद शहरात होणाऱ्या या अधिवेशनास १ हजार २०० क्लब मेंबर सहभागी होणार आहेत. महाराष्ट्रासह गोवा व गुजरातचा या झोनमध्ये समावेश होतो.
एलआयसीची विमा संरक्षणासह डिफर्ड पेन्शन योजना २० ते ६० वर्षांच्या लाभार्थीसाठी असून, एकल प्रीमियमसाठी दीड लाख, तर अन्य मोडसाठी एक लाख रुपये विमा राशी आहे. मूळ विमा राशी, बोनस, अंतिम अतिरिक्त बोनस मिळून येणारी रक्कम पेन्शन खरेदीसाठी वापरली जाईल किंवा नवीन सिंगल प्रीमियम डिफर्ड पेन्शन योजना खरेदी करता येईल. फ्लेक्सी प्लस सर्वात स्वस्त युलिप योजना असून, डेब्ट व मिक्स फंड यात उपलब्ध आहे. १८ ते ५० वयोगटासाठी असलेल्या या योजनेचा कालावधी १० ते २० वर्षांचा आहे. विमा राशी वार्षिक हप्त्याच्या दहापट किंवा एकूण भरलेल्या हप्त्याच्या १०५ टक्के यापैकी जी राशी जास्त असेल ती असेल, अशी माहिती या वेळी देण्यात आली.
एलआयसीचे कन्नड येथील कार्यालय आता सॅटेलाइट सुविधेने जोडले जाणार असल्याचेही अधिकाऱ्यांनी सांगितले.