एस.टी.च्या कार्यालयात साप निघाल्याने गोंधळ

मलकापूर मार्गावरील एस.टी. महामंडळाच्या विभागीय कार्यालयात काल सकाळी १०.३० वाजता सर्व कर्मचारी कामात व्यस्त असतानाच एका कर्मचाऱ्याच्या चाणाक्ष डोळ्यांनी टेबलाखालून भलामोठा साप गेल्याचे टिपले आणि तेथे चांगलाच गोंधळ उडाला व भीती निर्माण झाली; मात्र शहरातील सर्पमित्र श्रीराम रसाळ यांनी मोठय़ा शिताफीने हा बारा फूट लांबीचा साप जेरबंद केल्यानंतर सर्वानी सुटकेचा नि:श्वास सोडला.

मलकापूर मार्गावरील एस.टी. महामंडळाच्या विभागीय कार्यालयात काल सकाळी १०.३० वाजता सर्व कर्मचारी कामात व्यस्त असतानाच एका कर्मचाऱ्याच्या चाणाक्ष डोळ्यांनी टेबलाखालून भलामोठा साप गेल्याचे टिपले आणि तेथे चांगलाच गोंधळ उडाला व भीती निर्माण झाली; मात्र शहरातील सर्पमित्र श्रीराम रसाळ यांनी मोठय़ा शिताफीने हा बारा फूट लांबीचा साप जेरबंद केल्यानंतर सर्वानी सुटकेचा नि:श्वास सोडला.  बुलढाणा-मलकापूर मार्गावरील विभागीय कार्यालयातील लेखा विभागात ही थरारक घटना घडली. लेखा विभागाचे लिपिक मोहन लठ्ठाड यांना टेबलाखालून काहीतरी वेगाने सरपटत गेल्याचे जाणवले. बारकाईने पाहिल्यावर तो साप असल्याचे दिसून येत नाही तोच तो अडचणीच्या जागी जाऊन लपला. यामुळे पाचावर धारण बसलेल्या लठ्ठाड यांनी याची माहिती देताच लेखा विभागात एकच खळबळ उडाली. पाहता पाहता ही खबर वाऱ्याच्या वेगाने संपूर्ण विभाग नियंत्रक कार्यालय परिसरात पसरल्याने लेखा विभाग बघ्यांच्या गर्दीमुळे काही मिनिटांतच हाऊसफुल्ल झाला.
दरम्यान, या घटनेची माहिती भ्रमणध्वनीद्वारे सर्पमित्र श्रीराम रसाळ यांना देण्यात आल्यावर ते तातडीने घटनास्थळी पोहोचले. रसाळ यांना घटनास्थळीचा अदमास घेऊन अत्यंत सावधगिरीने दडून बसलेल्या या सापाला बाहेर काढून जेरबंद केले. यानंतर साऱ्यांनी सुटकेचा नि:श्वास सोडला. दरम्यान, या धाडसी कारवाईबद्दल विभागीय लेखा अधिकारी संजय गायधनी, कर्मचारी, विविध संघटनांच्या पदाधिकाऱ्यांनी रसाळ यांचे अभिनंदन करून आभार मानले. यानंतर विभागाचे दैनंदिन कामकाज सुरळीत सुरू झाले.

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

मराठीतील सर्व नागपूर वृत्तान्त बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App. ताज्या बातम्या (latest News) फेसबुक , ट्विटरवरही वाचता येतील.

Web Title: St office snake st mahamandal