‘रसेल मी, असेन मी..’ हे बोल वेस्ट इंडिजच्या आंद्रे रसेलने सार्थ ठरवले. त्याच्या अष्टपैलू खेळामुळे ख्राइस्टचर्च येथे कॅरेबियन संघाला शनिवारी विजयाचा राजमार्ग दिसला. दुसरीकडे पाकिस्तानी संघाची पराभवाची अंधारयात्रा अद्याप संपलेली नाही. भारताकडून पत्करलेल्या मानहानिकारक पराभवातून सावरू न शकलेल्या पाकिस्तानी संघाचा विंडीज संघाने १५० धावांनी धुव्वा उडवला. सलग दुसऱ्या पराभवामुळे आता पाकिस्तानी संघाला विश्वचषकातील आव्हान टिकवण्यासाठी उर्वरित सामन्यांत प्रयत्नांची पराकाष्ठा करावी लागणार आहे.हॅगले ओव्हलवर झालेल्या पूर्णत: एकतर्फी लढतीत रसेलने फक्त १३ चेंडूंत नाबाद ४२ धावांची खेळी साकारली. यात तीन चौकार आणि चार षटकारांचा समावेश होता. याचप्रमाणे दिनेश रामदिन (५१) आणि लेंडल सिमन्स (५०) यांनी आपल्या अर्धशतकांचे योगदान दिले. त्यामुळे प्रथम फलंदाजी करणाऱ्या विंडीजने ६ बाद ३१० धावा उभाल्या.त्यानंतर रसेलने ३३ धावांत ३ बळी घेण्याची किमया साधल्यामुळे विंडीजने पाकिस्तानचा डाव ३९ षटकांत १६० धावांत गुंडाळला.गेल्या रविवारी विश्वचषकाच्या सलामीच्या सामन्यात पाकिस्तानने भारताकडून ७६ धावांनी पराभव पत्करला होता. दुसऱ्या सामन्यातही पाकिस्तानी संघ सर्वच विभागांमध्ये अपयशी ठरला. या दोन पराभवांमुळे सात संघांचा समावेश असलेल्या ब-गटातून बाद फेरी गाठणे आता पाकिस्तानसाठी कठीण झाले आहे.नाणेफेक जिंकल्यावर प्रथम क्षेत्ररक्षण स्वीकारणाऱ्या पाकिस्तानने सुरुवातीला विंडीजची २ बाद २८ अशी अवस्था केली होती. परंतु त्यानंतर मात्र कॅरेबियन संघ सावरला आणि धावसंख्येचे त्रिशतक ओलांडले. अखेरच्या दहा षटकांत विंडीज संघाने ११५ धावा काढल्या. पाकिस्तानच्या संघाने तब्बल चार महत्त्वाचे झेल सोडले. मोहम्मद इरफान (१/४४) आणि शाहीद आफ्रिदी (०/४८) वगळता अन्य सर्व गोलंदाजांना विंडीजच्या फलंदाजांनी षटकाला सातपेक्षा अधिक धावांचा चोप दिला.पाकिस्तानच्या आशा तिसऱ्या षटकाच्या पहिल्याच चेंडूवर मावळल्या. धावफलकावर १ धाव झळकत असताना त्यांचे आघाडीचे चार फलंदाज तंबूत परतले होते. फक्त उमर अकमल (५९), शोएब मकसूद (५०) आणि शाहीद आफ्रिदी (२८) यांनी विंडीजच्या फलंदाजीचा नेटाने सामना करीत प्रतिकार करण्याचा प्रयत्न केला. पाकिस्तानचे बाकी आठही फलंदाज दोन आकडी धावासुद्धा करू शकले नाहीत.विंडीजचा वेगवान गोलंदाज जेरॉम टेलरने १५ धावांत तीन बळी घेत पाकिस्तानच्या आघाडीच्या फळीला हादरे दिले. डावखुरा फिरकी गोलंदाज सुलेमान बेनने दोन बळी घेतले. कर्णधार जेसन होल्डर आणि डॅरेन सॅमी यांनी प्रत्येकी एकेक बळी घेतला.संक्षिप्त धावफलकवेस्ट इंडिज : ५० षटकांत ६ बाद ३१० (दिनेश रामदिन ५१, लेंडल सिमन्स ५०, डॅरेन ब्राव्हो ४९ जखमी निवृत्ती, आंद्रे रसेल नाबाद ४२; हॅरिस सोहेल २/६२) विजयी वि. पाकिस्तान : ३९ षटकांत सर्व बाद १६० (उमर अकमल ५९, सोहेब मकसूद ५०; जेरॉम टेलर ३/१५, आंद्रे रसेल ३/३३) सामनावीर : आंद्रे रसेल.विंडीज संघाची कामगिरी अप्रतिम झाली. रसेल, सॅमी, सिमन्स, रामदिन यांनी जबाबदारीने फलंदाजी केली. नव्या चेंडूचा जेरॉम टेलरने खुबीने वापर केला. मी त्याला दुसऱ्या टोकावरून छान साथ दिली. प्रारंभी मिळवलेल्या बळींमुळे पाकिस्तानवर मोठे दडपण आले. पहिला सामना गमावल्यानंतर त्यातून सावरण्याची आवश्यकता होती. हा विजय कौतुकास्पद असाच आहे.- जेसन होल्डर, वेस्ट इंडिजचा कर्णधारआता जिंकू किंवा मरू या आविर्भावानेच उर्वरित विश्वचषकाकडे पाहावे लागणार आहे आणि त्याला पर्याय नाही. सर्वच विभागांमध्ये आमचे अपयश दिसून आले. आमची गोलंदाजी चांगली झाली नाही. फलंदाजी पूर्णत: अपयशी झाली. अनेक झेल सोडले. पहिले दोन सामने विसरून त्या सामन्यांच्या चुकांमधून धडे घेण्याची आवश्यकता आहे. कामगिरी चांगली झाली तरच आम्ही जिंकू शकू.- मिसबाह-उल-हक, पाकिस्तानचा कर्णधारडॅरेन ब्राव्होला ताकीदख्राइस्टचर्च : पाकिस्तानच्या खेळाडूला उद्देशून आक्षेपार्ह उद्गार काढल्याप्रकरणी वेस्ट इंडिजच्या डॅरेन ब्राव्होला आंतरराष्ट्रीय क्रिकेट परिषदेने (आयसीसी)ताकीद दिली आहे. आयसीसी आचारसंहितेच्या कलम २.१.४ चा भंग केल्याप्रकरणी ब्राव्होवर ही कारवाई करण्यात आली आहे. सामनाधिकारी डेव्हिड बून यांच्यासमोर ब्राव्होने आपली चूक मान्य केली. १५०एकदिवसीयमध्ये वेस्ट इंडिजचे पाकिस्तानविरुद्ध विजयाचे सर्वाधिक अंतर४ बाद १पाकिस्तानचा कमीत कमी धावसंख्येवर सर्वाधिक खेळाडू बाद होण्याचा नीचांक झाला. याआधी हा विक्रम झिम्बाब्वेच्या (४ बाद ४) नावावर होता.८९शेवटच्या सहा षटकांमध्ये वेस्ट इंडिजने फटकावलेल्या धावा. यामध्ये ५ षटकार आणि ६ चौकारांचा समावेश होता.