खुलताबाद फुलंब्री रोडवर चाकूचा धाक दाखवून ट्रकचालकांना लुटणाऱ्या दरोडेखोरांना पकडण्यातपोलिसांना यश आले आहे. औरंगाबाद दरोडा प्रतिबंधक पथकाने ही कारवाई केली. लखन थोरात आणि शेख समीर अशी आरोपीची नावे आहेत. वाळूज एमआयडीसीतून बियरचा माल घेऊन जाण्यारा ट्रग २३ तारखेला लुटण्यात आला होता. फुलंब्रीजवळील वारेगाव शिवारात ट्रक आला असता अज्ञात आरोपींनी ट्रक अडवून चालकाला चाकूचा धाक दाखवत ट्रकमधील माल लंपास केला होता. २३ एप्रिलच्या या घटनेनंतर चालक शेख याने फुलंब्री पोलिसात तक्रार दाखल केली होती.. तक्रारीवरून अज्ञात व्यक्तिविरोधात गुन्हा दाखल करण्यात आला होता. अज्ञात व्यक्तीचा शोध सुरु असताना खबऱ्यांकडून पोलिसांना या गुन्ह्यामध्ये लखन आणि समीर यांचा हात असल्याची माहिती मिळाली. या माहितीच्या आधारे सापळा रचून राहत्या घरातून दरोडा प्रतिबंधक पथकाने त्यांना अटक केली. आरोपींनी गुन्ह्याची कबुली दिल्यानंतर त्यांना फुलंब्री पोलिसांच्या ताब्यात देण्यात आलं आहे. सदर आरोपींवर नाशिक, अहमदनगरमध्ये गंभीर स्वरूपाचे गुन्हे असल्याची माहिती पोलीस तपासात पुढे आली आहे. त्यामुळे त्यांच्यांकढून आणखी काही घटनांचे धागेदोरे लागतात का याची चौकशी पोलीस करत आहेत.
