मराठवाडय़ातील मद्यनिर्मिती कारखान्यांना निम्मेच पाणी

मद्यनिर्मिती करणाऱ्या कारखान्यांना लागणाऱ्या पाण्यात गुरुवारपासून ५० टक्के पाणीकपात करावी, तसेच  १० मेनंतर त्यात आणखी १० टक्के कपातीमध्ये वाढ करावी, असे अंतरिम आदेश मुंबई उच्च न्यायालयाच्या औरंगाबाद खंडपीठाचे न्या. एस. एस. शिंदे, न्या. संगीतराव पाटील यांनी मंगळवारी दिले. या उद्योगांच्या पाण्याची ३० टक्के कपात पूर्वीच करण्यात आली. मद्यनिर्मिती उद्योगाबरोबरच अन्य उद्योगांच्या पाण्यामध्ये आणखी ५ टक्के कपात करण्याचे निर्देशही देण्यात आले आहेत. औरंगाबाद खंडपीठाच्या अखत्यारित सर्व जिल्ह्य़ांसाठी हा निर्णय लागू असल्याने नगर जिल्ह्य़ातील मद्यउद्योगालाही हा निर्णय लागू असणार आहे.