ह्युंदाई मोटारींच्या किमतीत वाढ

नवी दिल्ली : प्रवासी वाहननिर्मिती क्षेत्रातील आघाडीची कंपनी असलेल्या ह्युंदाईने नवीन वर्षात म्हणजेच १ जानेवारीपासून वाहनांच्या किमती २५,००० रुपयांनी वाढवण्याचा निर्णय घेतला आहे. वाहन उत्पादक कंपन्यांवर मागील काही काळापासून सुट्या भागांच्या वाढलेल्या किमतीचा दबाव आहे. वाहननिर्मितीसाठी येणाऱ्या खर्चात वाढ झाल्याने वाहनांच्या किमती वाढविण्याचा निर्णय घ्यावा लागल्याचे कंपनीकडून सांगण्यात आले. यामुळे जानेवारी २०२५ पासून विविध श्रेणींमधील वाहनांच्या किमती वाढणार आहेत. वाहननिर्मितीसाठी येणाऱ्या खर्चात वाढ होण्याबरोबरच प्रतिकूल विनिमय दर आणि वाहतूक (लॉजिस्टिक) खर्चात झालेली वाढदेखील किंमत वाढीस कारणीभूत ठरली आहे. ह्युंदाईपाठोपाठ आता इतर वाहन उत्पादक कंपन्यांकडूनदेखील नवीन वर्षात वाहनांच्या किमतीत वाढ केली जाण्याची शक्यता आहे.