पीटीआय, नवी दिल्ली
आर्थिक वर्ष २०२२-२३ साठी यंदा २ डिसेंबरपर्यंत एकूण ७ कोटी ७६ लाख प्राप्तिकर विवरणपत्रे दाखल करण्यात आली आहेत. चालू महिनाअखेरपर्यंत त्यात आणखी वाढ होणे अपेक्षित आहे, अशी माहिती सरकारच्या वतीने सोमवारी लोकसभेत देण्यात आली.
केंद्रीय अर्थराज्यमंत्री पंकज चौधरी यांनी लेखी उत्तरादाखल दिलेल्या माहितीत स्पष्ट केले आहे की, आर्थिक वर्ष २०२२-२३ मध्ये १०.०९ कोटी पॅनधारकांनी २०२१-२२ सालात कमावलेल्या उत्पन्नासाठी कर भरला होता. चालू आर्थिक वर्षात २ डिसेंबरपर्यंत ७ कोटी ७६ लाख जणांनी प्राप्तिकर विवरणपत्रे दाखल केली आहेत. विवरपत्रे दाखल करण्याची अंतिम मुदत ३१ डिसेंबरपर्यंत आहे. त्यामुळे विवरणपत्रे भरणाऱ्यांची संख्या आणखी वाढणे अपेक्षित आहे.
आणखी वाचा-हिमाचल प्रदेशात सर्वाधिक बेरोजगारी, जुलै ते सप्टेंबर राज्यनिहाय मनुष्यबळ सर्वेक्षणातील वास्तव
आर्थिक वर्ष २०२-२३ मधील प्राप्तीसाठी पगारदार करदात्यांना विवरणपत्रे दाखल करण्याची मुदत ३१ जुलै होती. मात्र विलंब शुल्कासह विवरणपत्रे भरण्याची अंतिम मुदत ही ३१ डिसेंबरपर्यंत आहे. आर्थिक वर्ष २०२२-२३ मध्ये निव्वळ प्रत्यक्ष कर संकलन १६.६३ लाख कोटी रुपये होते. त्यापैकी प्राप्तिकरापोटी संकलन ८.०८ लाख कोटी रुपये होते.
