पीटीआय, नवी दिल्ली
चालू खात्यातील तुटीवर परिणाम करणाऱ्या सोन्याच्या आयातीत मार्चमध्ये १९२.१३ टक्क्यांनी वाढ होऊन ती ४.४७ अब्ज डॉलर नोंदवली गेली आहे, असे केंद्रीय वाणिज्य मंत्रालयाच्या आकडेवारीवरून समोर आले आहे. जानेवारी २०२४ मध्ये सोन्याची आयात १.५३ अब्ज डॉलरवर मर्यादित राहिली होती.
सरलेल्या आर्थिक वर्षात म्हणजेच एप्रिल२०२४ ते मार्च २०२५ या कालावधीत सोन्याची आयात २७.२७ टक्क्यांनी वाढून ५८ अब्ज डॉलरवर पोहोचली आहे. त्याआधीच्या आर्थिक वर्षात (२०२३-२४) ती ४५.५४ अब्ज डॉलर होती. जागतिक अनिश्चिततेमुळे सोन्याकडे गुंतवणूकदारांचा कल वाढला असून, मध्यवर्ती बँकांकडून वाढती मागणी हे किमत वाढीचे प्रमुख कारण सांगता येईल.
गुरुवारी नवी दिल्लीत सोन्याचे भाव ९८,१७० रुपये प्रति १० ग्रॅम या विक्रमी उच्चांकावर पोहोचल्या होत्या. कमकुवत डॉलर, व्यापार युद्धातील वाढता तणाव आणि अमेरिकेचे अध्यक्ष डोनाल्ड ट्रम्प यांच्या अतिरिक्त कर घोषणांनंतर जागतिक आर्थिक वाढीबद्दल वाढती चिंता निर्माण झाल्यामुळे सोने विक्रमी उच्चांकी पातळीवर पोहोचले आहे. चांदीचे भाव देखील ९८,००० रुपये प्रति किलोवर पोहोचले आहे. मार्चमध्ये चांदीची आयात ८५.४ टक्क्यांनी कमी होऊन ११.९३ कोटी अमेरिकी डॉलरवर आली. वर्ष २०२४-२५ मध्ये ती ११.२४ टक्क्यांनी कमी होऊन ४.८२ अब्ज अमेरिकी डॉलर नोंदवली गेली आहे.
स्वित्झर्लंड हा सोन्याच्या सर्वात मोठा आयातदार देश आहे, ज्याचा सोने आयातीत सुमारे ४० टक्के वाटा आहे, त्यानंतर संयुक्त अरब अमिराती (१६ टक्क्यांहून अधिक) आणि दक्षिण आफ्रिका (सुमारे १० टक्क्यांहून अधिक) यांचा क्रमांक लागतो. देशाच्या एकूण आयातीमध्ये सोने-चांदी आयातीचा वाटा ८ टक्के आहे. आकारमानाच्या बाबतीत, २०२३-२४ मधील ७९५.३२ टनांच्या तुलनेत २०२४-२५ मध्ये आयात ७५७.१५ टनांवर घसरली.
सोन्याच्या आयातीत झालेल्या वाढीमुळे मार्चमध्ये देशाची व्यापार तूट (आयात आणि निर्यातीतील फरक) २१.५४ डॉलरवर पोहोचली. गेल्या आर्थिक वर्षात ती २८२.८२ अब्ज डॉलरच्या सर्वोच्च पातळीवर पोहोचली होती. चीननंतर भारत हा जगातील दुसऱ्या क्रमांकाचा सोन्याचा ग्राहक देश आहे.
आकडे बोलतात
- एकूण आयातीत सोने आयातीचा वाटा ८ टक्के
- गेल्या आर्थिक वर्षात व्यापार तूट २८२.८२ अब्ज डॉलरच्या सर्वोच्च पातळीवर
- वर्ष २०२४-२५ मध्ये ७५७.१५ टन सोने आयात
- मार्च महिन्यात सोने आयातीत १९२ टक्के वाढ
