किरकोळ महागाई दर ३.६१ टक्क्यांवर; रिझर्व्ह बँकेस एप्रिलमध्ये व्याजदर कपातीस वाव

जानेवारी २०२५ च्या तुलनेत फेब्रुवारी २०२५ मध्ये खाद्यान्न महागाईत २२२ आधारबिंदूंची तीव्र घट दिसून आली आहे

March 12, 2025 19:27 IST

inflation rate in February 2025 news in marathi

प्रातिनिधिक फोटो

नवी दिल्ली : भाज्या आणि प्रथिनेयुक्त वस्तूंच्या किमती घटल्यामुळे सरलेल्या फेब्रुवारीमध्ये किरकोळ महागाई दर ३.६१ टक्क्यांपर्यंत नरमला असून, रिझर्व्ह बँकेच्या अपेक्षेप्रमाणे सहनशील पातळीपर्यंत ही नरमाई येत्या एप्रिलमध्ये व्याज दरात दुसऱ्या कपातीस पूरक ठरेल, अशी आशा आहे.

राष्ट्रीय सांख्यिकी कार्यालयाने (एनएसओ) जाहीर केलेल्या आकडेवारीनुसार, ग्राहक किंमत निर्देशांकावर आधारित किरकोळ महागाई दर सरलेल्या फेब्रुवारीत सात महिन्यांच्या नीचांकी पातळीवर दिलासादायी घसरण झाली आहे. या आधी जानेवारीत तो ४.२६ टक्के, तर गेल्या वर्षी फेब्रुवारी २०२४ मध्ये ५.०९ टक्के पातळीवर होता. फेब्रुवारी २०२५ मध्ये वार्षिक सरासरी चलनवाढीचा दर ३.७५ टक्क्यांवर गडगडला आहे.

जानेवारी २०२५ च्या तुलनेत फेब्रुवारी २०२५ मध्ये खाद्यान्न महागाईत २२२ आधारबिंदूंची तीव्र घट दिसून आली आहे. फेब्रुवारीमधील खाद्यान्न महागाईची पातळी ही मे २०२३ नंतरची सर्वात कमी पातळीवर आहे. फेब्रुवारीत प्रमुख चलनवाढ (कोअर इन्फ्लेशन) आणि अन्नधान्याच्या महागाईत लक्षणीय घट झाल्याचे राष्ट्रीय सांख्यिकी कार्यालयाने म्हटले आहे.

This quiz is AI-generated and for edutainment purposes only.

भाज्या तसेच प्रथिनेयुक्त आहार असलेल्या अंडी, मांस आणि मासे, डाळी आणि उत्पादने, दूध आणि उत्पादनांच्या महागाईत घट झाल्यामुळे महागाईत तीव्र घसरण झाली आहे. किरकोळ महागाईदर ४ टक्क्यांच्या पातळीवर मर्यादित ठेवण्यासाठी रिझर्व्ह बँक प्रयत्नशील आहे. गेल्या महिन्यात महागाईच्या आघाडीवरील चिंता कमी झाल्या कारणाने तिने अल्पकालीन कर्ज दर (रेपो) २५ आधारबिंदूंनी कमी केला आहे. त्यामुळे पुढील महिन्यात ९ एप्रिल रोजी पुढील द्वैमासिक पतधोरण आढाव्याच्या बैठकीत तिचा पवित्रा काय राहिल, याबाबत आता उत्सुकता आहे.

Web Title: India s retail inflation eases to 7 month low of 3 6 percent in february print eco news zws