गुंतवणूकदार एका दिवसात झाले मालामाल; ‘या’ शेअरला २० टक्क्यांचे अप्पर सर्किट !

एनएसडीएलच्या समभागाने बुधवारी १० टक्के अधिमूल्यासह बाजारात ८८० रुपयांवर पदार्पण केले होते. प्रारंभिक समभाग विक्रीतून गुंतवणूकदारांना ८०० रुपयांना प्राप्त झालेल्या समभागाने १७ टक्के वाढीसह ९३६ रुपयांवर बुधवारी विश्राम घेतला होता. मात्र गुरुवारच्या सत्रात पुन्हा १,१२३.२० रुपयांची सत्रातील उच्चांकी पातळी गाठली. या बाजार भावानुसार, कंपनीचे २५,२५० कोटी रुपयांचे बाजार भांडवल आहे.

विश्लेषकांचे मत काय?

विश्लेषकांच्या मते, एनएसडीएलचे मजबूत मूलभूत तत्वे आणि रोखे आगार अर्थात डिपॉझिटरी सेगमेंटमधील नेतृत्व पाहता गुंतवणूकदारांनी दीर्घकाळासाठी शेअर्स धारण करण्याचा विचार करावा. बाजारात पदार्पणापासून दोन सत्रांमध्ये समभागांमध्ये आता जवळपास २८ टक्के वाढ झाली आहे. पहिल्या दोन दिवसांत कंपनीचे बाजार भांडवल लक्षणीयरीत्या वाढून २५,२५० रुपयांचा टप्पा ओलांडला. ‘एनएसडीएल’ने आयपीओच्या माध्यमातून ४,०११ कोटींची निधी उभारणी केली आहे. कंपनीच्या आयपीओला अभूतपूर्व प्रतिसाद मिळाला होता. कंपनीच्या आयपीओसाठी ४१ पट अधिक भरणा झाला होता. कंपनीने आयपीओसाठी ७६०-८०० रुपये किंमतपट्टा निश्चित केला होता.

आयपीओच्या माध्यमातून नॅशनल स्टॉक एक्स्चेंज (एनएसई), आयडीबीआय बँक, स्टेट बँक आणि एचडीएफसी बँक यासारखे विद्यमान भागधारक एनएसडीएलमधील त्यांची आंशिक हिस्सेदारी ओएफएसच्या माध्यमातून विक्रीला खुली केली. संपूर्ण ‘ओएफएस’ प्रकारचा हा आयपीओ असल्याने, एनएसडीएलला या माध्यमातून उभारला जाणारा कोणताही निधी मिळाला नाही.

कामगिरी कशी?

आर्थिक वर्ष २०२४-२५ मध्ये, एनएसडीएलचा निव्वळ नफा २४.५७ टक्क्यांनी वाढून ३४३ कोटी रुपये झाला आणि एकूण उत्पन्न १,५३५ कोटी रुपये झाले, जे आर्थिक वर्ष २०२३-२४ च्या तुलनेत १२.४१ टक्क्यांनी अधिक आहे. छोट्या वैयक्तिक गुंतवणूकदारांवर केंद्रीत सीडीएसएलच्या तुलनेत, एनएसडीएल ही उच्च लाभदायी अशा संस्थात्मक गुंतवणूकदार ग्राहकांवर केंद्रीत संस्था आहे.