मुंबई : वाहन निर्मिती कंपनी असलेल्या टाटा मोटर्सचे बहुप्रतिक्षित वाणिज्य आणि प्रवासी वाहन कंपन्यांमध्ये विलगीकरण १ ऑक्टोबर २०२५ पासून लागू झाले आहे. आता विभाजन झालेल्या वाणिज्य वाहन व्यवसाय कंपनीचे समभाग भागधारकांना देण्यासाठी कंपनीने १४ ऑक्टोबर रेकॉर्ड डेट निश्चित केली आहे. त्यामुळे आज म्हणजेच १३ ऑक्टोबररोजी टाटा मोटर्सचे शेअर खरेदी केल्यास नवीन तयार होणाऱ्या वाणिज्य कंपनीचे समभाग मोफत मिळवण्याची संधी आहे. यामुळे ज्या गुंतवणूकदारांना नवीन कंपनीचे समभाग मिळवायचे असल्यास त्यांनी दुपारी ३.३० पूर्वी म्हणजेच भांडवली बाजार बंद होण्याच्या आधी समभाग खरेदी करणे आवश्यक आहे.
विद्यमान टाटा मोटर्सचा भागधारकांना टाटा मोटर्सच्या वाणिज्य वाहन व्यवसाय विभाग असलेल्या आणि नव्याने सूचिबद्ध होणाऱ्या टीएमएल कमर्शियल व्हेईकल्स लिमिटेडचे समभाग मिळणार आहे, यासाठी भागधारकांची पात्रता निश्चित करण्यासाठी १४ ऑक्टोबर तारीख निश्चित केली आहे. यादिवसपर्यंत ज्या भागधारकांच्या खात्यात टाटा मोटर्सचे समभाग असतील तेच विभाजनानंतर नव्याने जन्मास आलेल्या वाणिज्य वाहन कंपनीचे समभाग मिळण्यास पात्र ठरणार आहेत.
टाटा मोटर्सच्या वाणिज्य वाहन व्यवसायाचे नाव आता टीएमएल कमर्शियल व्हेईकल्स लिमिटेड असे असेल आणि प्रवासी वाहन ज्यामध्ये विद्युत शक्तीवर चालणारी म्हणजेच ईव्ही आणि जग्वार लँड रोव्हर व्यवसायांचा समावेश असेल, त्या कंपनीचे नाव टाटा मोटर्स पॅसेंजर व्हेईकल्स असेल.
गेल्यावर्षी ४ मार्च २०२४ मध्ये टाटा मोटर्सच्या संचालक मंडळाने कंपनीचे दोन स्वतंत्र सूचिबद्ध कंपन्यांमध्ये विलगीकरण करण्यास मान्यता दिली होती. त्यामुळे कंपनीचा वाणिज्य वाहन व्यवसाय टीएमएल कमर्शियल व्हेईकल्स लिमिटेडमध्ये विलग केला जाईल, तर त्यांचा विद्यमान प्रवासी वाहन व्यवसाय टाटा मोटर्स लिमिटेडमध्ये विलीन केला जाईल.
भागधारकांची काय?
टाटा मोटर्सच्या विलगीकरणानंतर सध्याची कंपनी टाटा मोटर्स लिमिटेड ही टाटा मोटर्स पॅसेंजर व्हेईकल लिमिटेडमध्ये बदलेल तर टाटा मोटर्स कमर्शियल व्हेईकल ही विलग केलेली कंपनी असेल. कंपनीने निश्चित केलेल्या रेकॉर्ड तारखेला ज्यांच्याकडे टाटा मोटर्सचे शेअर असतील त्यांना नव्याने सूचिबद्ध होणाऱ्या वाणिज्य वाहन कंपनीचे समभाग मिळतील. म्हणजेच टाटा मोटर्सचे १०० शेअर असल्यास नवीन जन्माला असलेल्या वाणिज्य वाहन कंपनीचे १०० समभाग कोणतेही अतिरिक्त पैसे न देता मिळतील
