टाटा सन्सची धुरा चंद्रशेखरन यांच्याच हाती; निवृत्ती वयाच्या अटीचा अपवाद करत तिसऱ्या कार्यकाळास मंजुरी

मुंबईः टाटा सन्सच्या अध्यक्षपदी एन. चंद्रशेखरन हेच कायम राहणार असून, या पदावरील त्यांच्या तिसऱ्या कार्यकाळास टाटा ट्रस्टने मंजुरी दिल्याचे समजते. टाटा समूहात निवृत्तीची ६५ वर्षांची वयोमर्यादा असतानाही चंद्रशेखरन यांची निवड करण्यात आली आहे.

काही माध्यमांनी सूत्रांच्या हवाल्याने दिलेल्या वृत्तानुसार, टाटा सन्सच्या अध्यक्षपदाचा चंद्रशेखरन यांचा दुसरा कार्यकाळ फेब्रुवारी २०२७ मध्ये संपत आहे. त्यावेळी ते वयाची ६५ वर्षे पूर्ण करतील. टाटा समूहाच्या निवृत्तीच्या धोरणानुसार, वरिष्ठ पदावरील अधिकाऱ्याने ६५ व्या वर्षी निवृत्त होणे अपेक्षित आहे. याचवेळी बिगर कार्यकारी भूमिकेतील अधिकाऱ्यासाठी ही वयोमर्यादा ७० वर्षे आहे. मात्र चंद्रशेखरन या नियमाला अपवाद ठरतील, अशी शक्यता आहे. तथापि टाटा ट्रस्टने यावर अद्याप कोणतीही प्रतिक्रिया दिलेली नाही.

चंद्रशेखरन यांना वयाची ६५ वर्षे उलटल्यानंतरही, अधिकचा कार्यकाळ बहाल करण्याच्या निर्णयामागे समूहाच्या कामकाजात सातत्य राखणे हा हेतू आहे. समूहाकडून सेमीकंडक्टर, इलेक्ट्रिक वाहनांसाठी बॅटरी निर्मिती यासह विमानोड्डाण क्षेत्रातील महत्त्वाकांक्षी एअर इंडियाचा कायापालट हे महत्वाचे प्रकल्प सुरू आहेत. या प्रकल्पांच्या यशासाठी चंद्रशेखरन यांच्या नेतृत्वाची आवश्यकता आहे. टाटा ट्रस्टने चंद्रशेखरन यांच्या निवडीचा ठराव टाटा सन्सला पाठविला आहे. टाटा सन्सच्या संचालक मंडळाकडून चंद्रशेखरन यांच्या तिसऱ्या कार्यकाळास मंजुरी देताना या ठरावाचा विचार करावा लागेल, असेही सूत्रांनी म्हटल्याचे वृत्तात नमूद करण्यात आले आहे.