Gautam Adani : ‘हिंडेनबर्गचा अहवाल फक्त अदानी समूहावर हल्ला नव्हता तर…’, गौतम अदानींचं मोठं वक्तव्य

दरम्यान, या प्रकरणासंदर्भात बोलताना उद्योगपती गौतम अदानी यांनी एक मोठं विधान केलं आहे. ‘हिंडेनबर्ग रिसर्चचा तो अहवाल फक्त अदानी समूहावरील हल्ला नव्हता तर भारतीय उद्योगांच्या जागतिक स्तरावर स्वप्न पाहण्याच्या धाडसाला आव्हान होतं’, असं वक्तव्य गौतम अदानी यांनी केलं आहे. या संदर्भातील वृत्त हिंदुस्तान टाईम्सने दिलं आहे.

गौतम अदानी यांनी काय म्हटलं?

पोर्ट्स-टू-पॉवर समूहाचे संस्थापक गौतम अदानी यांनी बुधवारी शेअरहोल्डर्संना एक पत्र लिहिलं. त्या पत्रात म्हटलं की, “तो अहवाल फक्त तुमच्या अदानी समूहावर टीका करणारा नव्हता, तर जागतिक स्तरावर स्वप्न पाहण्याच्या भारतीय उद्योगांच्या धाडसाला ते थेट आव्हान होतं. अदानी समूहासाठी ही एक अशी परीक्षा होती जी आमच्या प्रत्येक पैलूला धक्का देणारी होती. आमच्या प्रशासनावर, आमच्या उद्देशावर आणि भारतीय कंपन्या मोठ्या प्रमाणात आणि महत्त्वाकांक्षेत जगाचं नेतृत्व करू शकणाऱ्या या कल्पनेवरही प्रश्नचिन्ह उपस्थित करणारा होता. पण सेबीच्या निर्णयामुळे सत्याचा विजय झाला”, असं त्यांनी म्हटलं आहे.

सेबीने क्लीन चीट देताना काय म्हटलं?

अदानी समूहावरील आरोप सिद्ध होऊ शकले नाहीत, सेबीने असं म्हटलं. सेबीने गौतम अदानी, राजेश अदानी, अदानी पोर्ट आणि अदानी पॉवर याच्याविरोधात दंड किंवा कारवाईची शक्यताही नाकारली आहे. सेबीला कोणतेही उल्लंघन झाल्याचं आढळून आलं नाही, संबंधित नसलेल्या पार्टीबरोबरच्या अशा प्रकारच्या व्यवहारांसाठी त्यावेळी रिलेटेड पार्टी डिलिंग्ज ही व्याख्या लागू नव्हती (ही व्याख्या २०२१ च्या सुधारणेनंतर लागू करण्यात आली) असं सेबीने दोन वेगवेगळ्या आदेशांमध्ये नमूद केलं. सेबीने असंही नमूद केलं की, कर्जांची व्याजासह परतफेड करण्यात आली, तसेच कोणताही निधी बाहेर वळवला गेला नाही. त्यामुळे कोणतीही फसवणूक किंवा ‘अनफेअर ट्रेड प्रॅक्टिस’ झाली नाही. त्यामुळे अदानी समूहाविरोधातील सर्व प्रकरणे रद्द करण्यात येत आहेत.

हिंडेनबर्गने काय आरोप केले होते?

गौतम अदानी यांच्या मालकीच्या अदानी समूहातील कंपन्यांविषयी हिंडेनबर्ग रिसर्चच्या १०६ पानी अहवालात अनेक गंभीर मुद्दे उपस्थित करण्यात आले होते. अदानी समूहातील कंपन्यांनी भांडवली बाजारात आपल्या समभागांचे भाव फुगवल्याचा दावा करण्यात आला होता. तसेच अदानी समूहाने बोगस कंपन्या स्थापन करून त्यांच्या माध्यमातून गैरव्यवहार केल्याचा गंभीर आरोपही हिंडेनबर्गने केला होता. कंपनीने क्षमतेपेक्षा अधिक कर्ज घेतले असून, हे कर्ज मिळवण्यासाठी कंपनीने समभागांचे मूल्य फुगवून दाखवले, असा ठपका अहवालात ठेवण्यात आला होता.