Success Story: दरवर्षी लाखो उमेदवार MPSC, UPSC यांसारख्या परीक्षेला बसतात, परंतु सर्वांनाच या परीक्षा उत्तीर्ण होता येत नाही.त्याचबरोबर कठोर परिश्रम केले, तर परीक्षेत यश मिळवणे कठीण नाही. आज आपण अशाच एका महिला डीएसपीची यशोगाथा जाणून घेणार आहोत, जिने तिच्या गरोदरपणात ही परीक्षा उत्तीर्ण करून अनेकांसाठी आदर्श निर्माण केला आहे.
मध्य प्रदेश लोकसेवा आयोग (MPPSC) २०२४ चा निकाल १२ सप्टेंबर रोजी जाहीर झाला, ज्यामध्ये मैहर येथील रहिवासी वर्षा पटेल हिने पोलिस उपअधीक्षक (DSP) पद मिळवले. वर्षाचा हा प्रवास तिचे यशच नाही, तर संघर्ष, संयम आणि कुटुंबाचे महत्त्व देखील दर्शवते.
कठीण परिस्थिती आणि संघर्षात बालपण गेलेल्या वर्षा पटेलचे लहानपणापासूनच अधिकारी होण्याचे स्वप्न होते; परंतु आर्थिक परिस्थिती चांगली नव्हती. त्यामुळे अनेक अडथळे आले. २०१५ मध्ये तिच्या वडिलांचे निधन झाले. त्यानंतर कुटुंबाला दमोह सोडून मैहरला यावे लागले. परिस्थिती प्रतिकूल होती. तरीही वर्षा यांनी अभ्यास सुरू ठेवला आणि ती ध्येयाकडे वाटचाल करीत राहिली.
लग्नानंतर सुरू केला अभ्यास
२०१७ मध्ये वर्षाचे लग्न वाराणसीमध्ये व्यवस्थापकीय नोकरीत असलेल्या संजय पटेल यांच्याशी झाले. संजय यांनी त्यांची नोकरी सोडली आणि पत्नीला चांगली तयारी करता यावी म्हणून तिला इंदूरला पाठवले. वर्षा दरवर्षी परीक्षेला बसायची; पण प्रत्येक वेळी हाती अपयश आले. २०२४ ची परीक्षा वर्षासाठी खूप खास ठरली होती. त्या काळात ती गर्भवती होती. २२ जुलै २०२५ रोजी तिने श्रीजा या मुलीला जन्म दिला. मुलाखतीची तारीख फक्त २६ दिवसांनी म्हणजे १८ ऑगस्ट रोजी होती. जखमा अद्याप पूर्णपणे बऱ्या झालेल्या नव्हत्या. मग वर्षा तिच्या नवजात मुलीला मांडीवर घेऊन मुलाखतीसाठी पोहोचली.
१२ सप्टेंबर २०२५ रोजी निकाल आला तेव्हा वर्षाने डीएसपी पदावर यश मिळवल्याची माहिती मिळाली. विशेष म्हणजे महिला वर्गात तिला पहिले स्थान मिळाले. तिच्या संघर्ष आणि समर्पणामुळे आज लोक तिला ‘सुपर मॉम’ म्हणून ओळखतात.
