ओडिशातील सुंदरगड जिल्ह्यातील बराई परिसरात झालेल्या एका अपघातामध्ये नऊ कबड्डीपटू ठार झाले असून, पाचजण गंभीर जखमी असल्याचे वृत्त आहे. सुंदरगड जिल्ह्यातील सुरापल्ली गावाजवळ ही दुर्घटना घडली. काल रात्री कबड्डीचा संघ मिनीबसमधून सेंधापूरहून धुदीगाव येथे स्पर्धेसाठी जात होता. त्याचवेळी मिनीबस पुलावरून कोसळल्याने सदर दुर्घटना घडली आणि त्यात नऊ कबड्डीपटूंना आपले प्राण गमवावे लागले. या अपघातात पाचजण जखमी झाले असून त्यांना लहुनीपारामधील रुग्णालयात दाखल करण्यात आले आहे. मृतांमध्ये अभिराम कालो, धरनीधर नायक, चंद्रशेखर प्रधान, उमेश किसन, गौरी चंद्र किसन यांचा समावेश आहे. मुख्यमंत्री नवीन पटनाईक यांनी अपघाताबद्दल दुःख व्यक्त करत, मृतांच्या नातेवाईकांना एक लाख रुपयांची मदत जाहीर केली आहे.
