बदलापुरातील आश्रमावर हल्ला प्रकरणात दरोडा व दंगल यांसारखे गंभीर गुन्हे दाखल असलेला राष्ट्रवादीचा नगरसेवक आशिष दामले याला पोलीसांनी मंगळवारी मध्य प्रदेशातून ताब्यात घेतले.
बदलापूरपासून जवळ असलेल्या इंदगाव येथे नरेश रत्नाकर यांच्या साधना भवन या आश्रमात दोन जून रोजी रात्री ११च्या सुमारास दहा-पंधरा कार्यकर्त्यांसमवेत शिरलेल्या दामले याने तेथे तोडफोड केली. तसेच येथील कर्मचाऱ्यांना मारहाणही केली. याप्रकरणी कुळगाव-ग्रामीण पोलीस ठाण्यात दामलेवर दरोडय़ाच्या गुन्ह्यासह धमकावणे, घराची तोडफोड करणे, बंदुकीचा धाक दाखवून लुटमार करणे असे गुन्हे दाखल करण्यात आले आहेत. या घटनेनंतर फरार असलेल्या दामलेला कल्याणच्या जिल्हा सत्र न्यायालयाने अटकपूर्व जामीन नाकारला होता. त्यानंतरही तो मध्य प्रदेशातील इंदूर, देवासमध्ये वेगवेगळ्या ठिकाणी राहात होता. पोलीस सातत्याने त्याच्या मागावर होते. दामले ओरसा येथे असल्याची माहिती पोलीसांना मिळाल्यावर मंगळवारी सकाळी तेथील एका हॉटेलवर छापा टाकून पोलीसांनी त्याला अटक केली.