हरयाणाच्या भिवानी जिल्ह्यातील सत्र न्यायालयाच्या आवारात सोमवारी हल्लेखोरांनी केलेल्या गोळीबारात एका हेड कॉन्स्टेबलचा मृत्यू झाला आहे. हल्लेखोरांनी अपहरण प्रकरणातील एका आरोपीला सोडवण्याचा प्रयत्न केला. पण त्यांचा प्रयत्न असफल ठरला. या गोळीबारात हेड कॉन्स्टेबल भागीरथ यांचा मृत्यू झाला. पोलिसांनी दोन हल्लेखोरांना पकडले असून अन्य दोन पळून जाण्यात यशस्वी ठरले अशी माहिती भिवानीचे पोलीस अधीक्षक गंगा राम पुनिया यांनी दिली. तीन ते चार हल्लेखोर सिवानीमधील कोर्टाच्या आवारात घुसले. अपहरणाच्या प्रकरणात आरोपी जय कुमार तसेच आणखी एक आरोपी सुनीलला न्यायालयात हजर केल्यानंतर त्यांना तुरुंगात नेण्यात येत होते. त्याच दरम्यान आरोपींनी गोळीबार सुरु केला. जय कुमारला सोडवण्याचा त्यांचा प्रयत्न होता.
