छत्तीसगडमधील सुकमा जिल्ह्य़ात शुक्रवारी आयईडीच्या स्फोटात केंद्रीय राखीव पोलीस दलाचा (सीआरपीएफ) एक जवान शहीद, तर चार जण जखमी झाले. जखमींमध्ये दोन अधिकाऱ्यांचा समावेश आहे. कोंटा पोलीस ठाण्याच्या हद्दीत येणाऱ्या मुरलीगुडानजीकच्या जंगलात ही घटना घडली. मुरलीगुडा आणि बांदा या गावांदरम्यान रस्ता बांधण्याचे काम सुरू असून, तेथे सुरक्षा पुरवण्यासाठी सीआरपीएफचे गस्ती पथक या ठिकाणी आले असताना नक्षलवाद्यांनी हा स्फोट घडवून आणल्याचे सुकमा जिल्ह्य़ाचे अतिरिक्त पोलीस अधीक्षक संतोष सिंह यांनी सांगितले. या स्फोटात धातूचे तुकडे अंगात शिरून जखमी झालेले हेड कॉन्स्टेबल रंगा राघवन हे रुग्णालयात मरण पावले, तर उपसमादेशक श्याम निवास हे गंभीर असून इतर तिघांची प्रकृती स्थिर असल्याचे पोलिसांनी सांगितले.
