पाठलाग करुन प्रॉपर्टी डिलरची हत्या, जीव वाचवण्यासाठी गाड्यांच्या पाठीमागे लपण्याचा करत होता प्रयत्न

राहुल सिंह नगर असे मृत व्यक्तीचे नाव असून २०१७ साली राष्ट्रवादी काँग्रेसच्या तिकीटावर त्याने विनोद नगर मतदारसंघातून महापालिकेची निवडणूक लढवली होती. राहुल सिंह नगर हे महापालिका निवडणूक लढवणाऱ्या श्रीमंत उमेदवारांपैकी एक होते. जवळपास साडेनऊ कोटीची संपत्ती त्यांनी दाखवली होती. हिंदुस्थान टाइम्सने हे वृत्त दिले आहे.

राहुल सिंह यांची हत्या करणाऱ्या गुन्हेगारांची ओळख पटलेली नसून त्यांचा उद्देशही स्पष्ट झालेला नाही असे पोलिसांनी सांगितले. संपत्तीच्या वादातून ही हत्या झाल्याचा पोलिसांचा संशय आहे. राहुल सिंह नगर यांच्यावर चार गोळया झाडण्यात आल्या. रुग्णालयात नेण्यापूर्वीच त्यांचा मृत्यू झाला अशी माहिती पोलीस उपायुक्त जसमीत सिंह यांनी दिली. राहुल सिंह पेशाने प्रॉपर्टी डिलर असून पत्नी आणि मुलीसह ते विनोद नगरमध्ये रहायचे. गुन्हा घडला त्या ठिकाणाहून एक किलोमीटर अंतरावर त्यांचे घर आहे.