भारताचा माजी कर्णधार आणि बीसीसीआय अध्यक्ष सौरव गांगुली याच्या परिवारातील सदस्यांना करोनाची लागण झाल्याचं समोर आलंय. सौरव गांगुलीचा मोठा भाऊ स्नेहाशिष गांगुलीची पत्नी आणि तिच्या आई-बाबांना करोनाची लागण झाल्याची माहिती, पश्चिम बंगालच्या आरोग्य विभागाने दिली आहे. स्नेहाशिष गांगुली बंगाल क्रिकेट असोसिएशनमध्ये सचिव या पदावर काम करतो. स्नेहाशिष यांच्या घरी काम करणारा व्यक्ती करोना पॉजिटीव्ह आढळला होता. यानंतर घरातल्या लोकांची चाचणी केली असता, स्नेहाशिष याची पत्नी व सासु-सासऱ्यांचा अहवाल पॉजिटीव्ह आढळला आहे. स्नेहाशिष याचा अहवाल मात्र निगेटीव्ह आला आहे. स्नेहाशिषने रणजी क्रिकेट सामन्यात बंगालचं प्रतिनिधीत्व केलं आहे. सर्व रुग्णांवर खासगी रुग्णालयात उपचार सुरु असल्याची माहिती आरोग्य विभागाच्या अधिकाऱ्यांनी दिली.
