CCTV: जेवताना अंगावर हात टाकल्याने रोखलं, तरुणांकडून मुलींना फरफटत नेत बेदम मारहाण; चीनमधील धक्कादायक घटना

सीसीटीव्हीत आरोपी जेवायला बसलेल्या तरुणीला जाणुनबुजून स्पर्श करताना दिसत आहे. यावेळी तरुणीसोबत तिच्या मैत्रिणीदेखील होत्या. तरुणीने त्याचा हात झटकताच त्याने तिला कानाखाली लगावली. यानंतर तरुणीने विरोध केला असता त्याने आणि त्याच्या मित्रांनी त्यांच्यावर हल्ला केला आणि मारहाण करण्यास सुरुवात केली. दोन तरुणींना फरफटत बाहेर नेत लाथा बुक्क्यांनी मारहाण करण्यात आली. तर एक तरुणी रेस्तराँमध्ये खाली जमिनीवर पडल्याचं सीसीटीव्हीत दिसत आहे.

हा व्हिडीओ मोठ्या प्रमाणात व्हायरल झाला असून चीनमधील महिला सुरक्षेवर प्रश्नचिन्ह उपस्थित करत आहे. तसंच यानिमित्ताने लैंगिकतेच्या आधारावर होणाऱ्या हिंसेवरही चर्चा सुरु झाली आहे. यासोबत महिला हक्कांचा मुद्दाही प्रकर्षाने समोर आला आहे.

पोलिसांनी दिलेल्या माहितीनुसार, आठ जणांना अटक करण्यात आली असून एकाचा शोध सुरु आहे. जखमी तरुणींना रुग्णालयात दाखल करण्यात आलं आहे. दोघींची प्रकृती स्थिर आहे, तर इतर दोघी जखमी असून उपचार सुरु आहेत.