Rajasthan Peon Jobs: देशात बेरोजगारीची समस्या दिवसेंदिवस उग्र बनत चालली आहे. अनेक तरूणांनी पदव्या मिळवूनही त्यांना इच्छित नोकरी मिळत नाही. यासाठी वाट्टेल ते काम मिळवून उपजीविका चालविण्याचा तरूणांचा प्रयत्न असतो. राजस्थानमध्ये सध्या शिपाई पदाची भरती निघाली आहे. या पदासाठी दहावीपर्यंतचे शिक्षण आवश्यक असतानाही अनेक उच्चशिक्षित उमेदवारांनी सदर नोकरीसाठी अर्ज केला आहे.
राजस्थानने सध्या ५३ हजार जागांची भरती काढली आहे. यासाठी २५ लाखांहून अधिक उमेदवारांनी अर्ज केला आहे. दहावी उत्तीर्ण पात्रता आवश्यक असताना अनेक एमएससी, बीटेक, पीएचडी धारक उमेदवारांनी यासाठी अर्ज केला आहे.
जयपूरमधील गांधी नगर परीक्षा केंद्राबाहेर सकाळी उमेदवारांनी मोठी रांग लावली होती. अनेक उच्चशिक्षित तरूणांना सरकारी नोकरी हवी आहे. यासाठी ते शिपाई पदासाठीही अर्ज करत आहेत. यावरून भारतात किती भीषण बेरोजगारी आहे, याचे चित्र दिसून येते, अशी चर्चा आता पुन्हा एकदा होत आहे. जयपूरच्या परीक्षा केंद्रावर परीक्षा पार पडल्यानंतर राज्यभरातून आलेल्या उमेदवारांनी बस स्टँडवर घरी जाण्यासाठी तोबा गर्दी केली. मिळेल त्या मार्गाने उमेदवार बसमध्ये शिरण्याचा प्रयत्न करत होते. इंडिया टुडेने यााबाबतचे वृत्त दिले आहे.
राजस्थानमध्ये एकूण ३८ जिल्ह्यातील १,२८६ परीक्षा केंद्रावर सदर परीक्षा पार पडली. उच्चशिक्षित तरूणही आता शाळेची घंटा वाजवणे, पाणी देणे, फायली उचलण्यासारखे काम करण्यास तयार झाले आहेत. राजस्थानने एकूण ५३,७४९ पदांची भरती काढली असून यासाठी केवळ १० टक्के उमेदवार असे आहेत, ज्यांच्याकडे आवश्यक पात्रता आहे. उर्वरित ९० टक्के उमेदवार हे उच्चशिक्षित आहेत.
