खोट्या आश्वासनांच्या निषेधासाठी उपोषण करणार का, ओवेसींचा मोदींना सवाल

एमआयएम पक्षाचे प्रमुख खासदार असदुद्दीन ओवेसी यांनी पंतप्रधान नरेंद्र मोदींवर टीकास्त्र सोडले आहे. काँग्रेससह सर्वच विरोधी पक्षांच्या गदारोळात संपूर्ण अर्थसंकल्पीय अधिवेशन निष्फळ ठरल्याचा निषेध म्हणून मोदी हे गुरूवारी लाक्षणिक उपोषण करणार आहेत. त्याचा समाचार घेत हा जनतेच्या डोळ्यात धूळफेक करण्याचा प्रकार असल्याची टीका त्यांनी केली. संसदेत गोंधळ करणाऱ्या खासदारांना निलंबित करण्याचा लोकसभा अध्यक्षांना अधिकार आहे. यापूर्वी त्यांनी काँग्रेसच्या खासदारांना निलंबित केले होते. मग यावेळी ही असंच करायला हवं होतं. पण नीरव मोदी, मेहुल चौकसीबाबत संसदेत उत्तर द्यावं लागलं असतं. त्यांना अविश्वास ठरावावर चर्चा नको होती, असा गंभीर आरोप ओवेसी यांनी केला. पंतप्रधान आपल्या खोट्या आश्वासनांचा निषेध म्हणून उपोषण का करत नाहीत, ज्या शेतकऱ्यांनी आपल्या हक्कांसाठी लढताना प्राण गमावला त्यांच्यासाठी ते का उपोषण करत नाहीत, असा सवालही उपस्थित केला.