मुंबई-बंगळुरू प्रस्तावित औद्योगिक कॉरिडॉरला कितपत यश मिळेल याची व्यवहार्यता तपासून पाहण्याचे सरकारने तत्त्वत: मान्य केले असल्याची माहिती केंद्रीय वाणिज्यमंत्री आनंद शर्मा यांनी शनिवारी येथे दिली.
प्रस्तावित कॉरिडॉरच्या अटी व शर्ती काय असाव्यात, या बाबत पडताळणी सुरू असल्याचेही शर्मा म्हणाले. कर्नाटकचे मुख्यमंत्री जगदीश शेट्टर यांच्याशी पायाभूत सुविधांबाबत चर्चा केल्यानंतर शर्मा वार्ताहरांशी बोलत होते.
चेन्नई-बंगळुरू प्रस्तावित कॉरिडॉरचा चित्रदुर्गपर्यंत विस्तार करावा, ही राज्य सरकारने केलेली मागणी केंद्र सरकारने मान्य केली आहे. दिल्ली-मुंबई औद्योगिक कॉरिडॉरची लक्षणीय प्रगती पाहून केंद्रीय अर्थमंत्री पी. चिदम्बरम यांनी २०१३-१४ च्या अर्थसंकल्पात बंगळुरू-चेन्नई आणि बंगळुरू-मुंबई अशा दोन अतिरिक्त कॉरिडॉरची घोषणा केली होती.