तब्बल ६० वर्षांनंतर चीनमध्ये घडला इतिहास; १९६१ नंतर पहिल्यांदाच लोकसंख्येचा उलट्या दिशेनं प्रवास!

याशिवाय चीनने १९७६ नंतर पहिल्यांदाच सर्वात अधिक मृत्यूदर नोंदविला आहे. २०२१ मध्ये प्रति हजार लोकांमागे ७.१८ टक्के असलेला मृत्यूदर आता वाढून तो ७.३७ टक्के एवढा झाला आहे. सांख्यिकी ब्युरोने दिलेल्या माहितीनुसार घसरलेल्या जन्मदराला एक अपत्य धोरण कारणीभूत असावे, असा अंदाज बांधला गेला आहे. १९८० पासून ते २०१५ पर्यंत एक अपत्य धोरण चीनने राबविले होते. तसेच उच्च शिक्षण महाग झाल्यामुळे लोकांमध्ये दोन किंवा एक अपत्य जन्माला घालण्यास निरुत्साह दिसला. २०२१ पासून चीनने पुन्हा एकदा लोकसंख्या वाढीसाठी प्रयत्न सुरु केले आहेत. त्यासाठी करामध्ये सूट, प्रसूती रजेमध्ये वाढ, घर घेण्यासाठी अनुदान देणे अशा योजनांची सुरुवात करण्यात आली आहे.

भारताचीही लोकसंख्या १४१ कोटींवर

चीन आणि भारताच्या लोकसंख्येची नेहमीच तुलना होत असते. भारतात दर दहा वर्षांनी जनगणना होत असते. मात्र २०२१ रोजी करोनाच्या प्रादुर्भावामुळे जनगणना होऊ शकलेली नाही. २०११ साली जी जनगणना झाली त्यामध्ये भारताची लोकसंख्या १२१ कोटी एवढी होती. त्यानंतरच्या १२ वर्षांत लोकसंख्येत वाढ झालेली आहे. worldometers या वेबसाईटने दिलेल्या माहितीनुसार भारताची आताची लोकसंख्या ही १४१ कोटी ५२ लाख एवढी आहे.

करोनामुळे एक महिन्यात ६० हजार मृत्यू

लोकसंख्येबाबत चीनला दिलासा मिळाला असला तरी करोनोच्या नव्या लाटेमुळे चीनचे कंबरडे मोडले आहे. शून्य करोना धोरण राबविल्यानंतर डिसेंबर २०२२ मध्ये चीनने निर्बंधात शिथीलता आणली आणि त्यानंतर पुन्हा एकदा देशात करोनाचा प्रताप दिसू लागला. गेल्या ३५ ते ४० दिवसांत चीनमध्ये अधिकृत ६० हजार लोकांचा करोनामुळे मृत्यू झाला असल्याचे सांगण्यात येत आहे.