आगामी सार्वत्रिक निवडणुकीत राष्ट्रीय लोकशाही आघाडीला विजयी करण्याचा निर्धार नरेंद्र मोदी यांनी व्यक्त केला आहे. भाजपचे पंतप्रधानपदाचे उमेदवार म्हणून मोदी यांच्या नावाची शुक्रवारी घोषणा करण्यात आली, त्यानंतर शनिवारी त्यांनी ट्विटरवर ही प्रतिक्रिया व्यक्त केली. माझ्या निवडीनंतर अभिनंदन करणाऱ्या तसेच मला शुभेच्छा देणाऱ्या सर्व मित्रपक्षांचे मी आभार मानतो, असे ते म्हणाले. आगामी निवडणुकीत रालोआला विजयी करण्यासाठी मी सर्वतोपरी प्रयत्न करेन, याची खात्री बाळगा. भ्रष्टाचार आणि सतत होणारी महागाई हे देशासमोरचे प्रमुख प्रश्न असून आम्ही त्या विरोधात लढू, तसेच विकास आणि सुराज्य हा आमचा नारा असेल, सर्वाचे आशीर्वाद लाभल्यास सत्ता मिळविणे कठीण नाही, असे त्यांनी म्हटले आहे.
