“शिकारी ट्रम्प यांनी काम सुरू केलंय”, संरक्षण तज्ज्ञांकडून इराणवरील हल्ल्याचं विश्लेषण; म्हणाले, “इतिहासाची पुनरावृत्ती…”

या हल्ल्याबाबत वेगवेगळी माहिती समोर येत असताना अनेक संरक्षण तज्ज्ञ या हल्ल्याचं व त्याच्या जगावर होणाऱ्या परिणामांबाबत विश्लेषण करत आहेत. दरम्यान, संरक्षण तज्ज्ञ प्रफुल्ल बक्षी म्हणाले, “इराणला आता समजलंय की अमेरिका या युद्धाबाबत खूप गंभीर आहे. अमेरिका आता शिकार करण्यासाठी बाहेर पडली असून शिकार देखील निवडण्यात आली आहे. अमेरिकेने हल्ले देखील सुरू केले आहेत. अमेरिकन लष्कर आता शिकार केल्याशिवाय माघारी परतणार नाही. शिकारी ट्रम्प यांनी त्यांचं काम सुरू केलं आहे”.

प्रफुल्ल बक्षी काय म्हणाले?

बक्षी म्हणाले, “अमेरिका शिकार कशी करते ते आपण याआधी इराकच्या दोन्ही युद्धांच्या वेळी पाहिलं आहे. आता हे युद्ध (इस्रायल-इराण) कधी व कुठे थांबतंय ते पाहावं लागेल. या युद्धात आतापर्यंत इराणचं बरंच नुकसान झालं आहे, अमेरिकेनेही हल्ले केले आहेत, यातून इराणला डोकं वर काढायला बराच वेळ लागेल”.

“चीन व रशियासाठी हा मोठा इशारा”

प्रफुल्ल बक्षी म्हणाले, “अमेरिका व इस्रायलने इराणी लष्कराला निष्प्रभ करून टाकलंय. तसेच इराणला थेट संदेश दिला आहे की आता तरी जागेवर या. ट्रम्प यांनी सांगितलंय की मी आता लष्करी कारवाई करणार नाही. मात्र तुम्ही ऐकलं नाही तर मी थांबणार नाही. इराणसाठी हा खूप मोठा इशारा आहे. तसेच इराण समर्थक राष्ट्रांना देखील ट्रम्प यांनी इशारा दिला आहे. प्रामुख्याने चीन व रशियासाठी हा मोठा इशारा आहे. कारण ही दोन्ही राष्ट्रे इराणचं समर्थन करतात. तर, इस्रायलला समजलंय की अमेरिका पूर्णपणे आपल्याबरोबर आहे”.