Donald Trump: डोनाल्ड ट्रम्प यांची अरेरावी सुरूच! भारताला धमकी देत म्हणाले, “प्रत्युत्तर दिले तर…”

यानंतर डोनाल्ड ट्रम्प म्हणाले की, जर भारताने प्रत्युत्तर दिले तर टॅरिफ आणखी वाढवले जाईल. ट्रम्प यांच्या आदेशानुसार, हा टॅरिफ दोन टप्प्यांत लागू केला जाईल. पहिल्या टप्प्यात, उद्यापासून म्हणजेच ७ ऑगस्टपासून २५ टक्के कर लागू केला जाईल, तर दुसरा टप्पा २७ ऑगस्टपासून लागू केला जाईल.

डोनाल्ड ट्रम्प यांनी सोमवारी म्हटले होते की, भारत केवळ रशियाकडून तेल खरेदी करत नाही तर ते बाजारात विकून मोठा नफाही कमवत आहे. युक्रेनमध्ये किती लोक मारले जात आहेत याची भारताला पर्वा नाही आणि मी टॅरिफ आणखी वाढवीन.

ट्रम्प यांनी त्यांच्या ट्रुथ सोशल प्लॅटफॉर्मवर लिहिले होते की, “भारत केवळ मोठ्या प्रमाणात रशियन तेल खरेदी करत नाही, तर खरेदी केलेल्या तेलाचा मोठा भाग खुल्या बाजारात मोठ्या नफ्यावर विकत आहे. रशियन युद्धयंत्रणेमुळे युक्रेनमध्ये किती लोक मारले जात आहेत याची त्यांना पर्वा नाही. यामुळे, मी भारतावर टॅरिफ मोठ्या प्रमाणात वाढवेन.”

भारताकडून प्रत्युत्तर

यानंतर भारतानेही ट्रम्प यांना योग्य उत्तर दिले होते. परराष्ट्र मंत्रालयाचे प्रवक्ते रणधीर जयस्वाल म्हणाले की, भारत आपल्या राष्ट्रीय हितांचे आणि आर्थिक सुरक्षेचे रक्षण करण्यासाठी आवश्यक ती सर्व पावले उचलेल.

एका निवेदनात परराष्ट्र मंत्रालयाने म्हटले होते की, “भारतावर टीका करणारे देश स्वतः रशियाशी व्यापार करत आहेत. अमेरिकेचा विचार केला तर, ते आपल्या अणुउद्योगासाठी युरेनियम हेक्साफ्लोराइड, आपल्या ईव्ही उद्योगासाठी पॅलेडियम, खते आणि रसायने रशियाकडून आयात करत राहतात. अशा परिस्थितीत, भारताला लक्ष्य करणे अन्याय्य आणि तर्कहीन आहे. कोणत्याही मोठ्या अर्थव्यवस्थेप्रमाणे, भारत आपल्या राष्ट्रीय हितांचे आणि आर्थिक सुरक्षेचे रक्षण करण्यासाठी आवश्यक असलेली सर्व पावले उचलेल.”