मध्य प्रदेशातील रेवा जिल्ह्यात एक धक्कादायक घटना उघडकीस आली आहे. येथील एका ५१ वर्षीय व्यक्तीनं आपल्या सुनेला सुपारी देऊन पत्नीचा काटा काढला आहे. हा धक्कादायक प्रकार उघडकीस येताच पोलिसांनी आरोपी सासऱ्यासह २५ वर्षीय सुनेला अटक केली आहे. या घटनेचा पुढील तपास पोलीस करत आहेत. वाल्मिकी कोळ (वय -५१) आणि कांचन कोळ (वय-२५) असं अटक केलेल्या आरोपींची नावं आहेत. पोलिसांनी दिलेल्या माहितीनुसार, आरोपी वाल्मिकी याला दुसरं लग्न करायचं होतं. पण त्याची पहिली पत्नी सरोज ही अडसर ठरत होती. तसेच मृत सरोज आणि सून कांचन यांच्यात सतत वाद व्हायचा. हीच संधी साधून आरोपी वाल्मिकी कोळ यानं पत्नी सरोज हिची हत्या करण्यासाठी सुनेला ४ हजार रुपयांची सुपारी दिली. तसेच दर महिन्याला ठरावीक रक्कम देण्याचा वादा देखील केला. त्यानुसार सून कांचन हीने गळा चिरून आपल्या सासूची हत्या केली. १२ जुलै रोजी राहत्या घरात सरोज यांचा मृतदेह आढळला. घटनेच्या दिवशी आरोपी वाल्मिकी सटना येथे आपल्या नातेवाईकाच्या घरी गेला होता. तर त्यांचा मुलगा (आरोपी सून कांचनचा पती) कामानिमित्त मेरठला गेला होता. याच संधीचा फायदा घेऊन आरोपी सुनेनं आपल्या सासुच्या डोक्यात लोखंडी तव्याने वार केला. या हल्ल्यात सासू सरोज बेशुद्ध झाल्या, त्यानंतर सुनेनं सासऱ्यानं पुरवलेल्या विळ्याच्या सहाय्याने सासूचा गळा चिरला. हेही वाचा- पुणे : सिंहगड रस्ता भागात भरदिवसा घरफोडी ; सदनिकेतून पाच लाखांचा ऐवज लंपास ही धक्कादायक घटना उघडकीस आल्यानंतर परिसरात खळबळ उडाली आहे. प्राथमिक तपासाच्या आधारे पोलिसांनी सासरा वाल्मिकी कोळ आणि सून कांचन कोळ यांना अटक केली आहे. या घटनेचा पुढील तपास पोलीस करत आहेत.
