Chhangur Baba Conversion Racket: अवैध धर्मांतर करणाऱ्या छांगूर बाबाचे रॅकेट उघड; एकेकाळी सायकलवर फिरणारा बाबा कोट्यधीश कसा झाला?

उत्तर प्रदेशच्या बलरामपूर जिल्हा प्रशासनाने मोठ्या भूखंडावर बांधलेले छांगूर बाबाचे प्रशस्त निवासस्थानही जमीनदोस्त केले. तीन दिवसांपासून पाडकामाची कारवाई सुरू आहे. पोलिसांनी सांगितले की, छांगूर बाबा गरीब, मजूर, वंचित घटकातील लोक, विधवांना आर्थिक मदत देण्याचे आमिष दाखवून किंवा लग्न करण्याचे वचन देत धर्मांतरासाठी तयार करत असे. यातून त्याने अवैध मार्गाने अनेकांचे धर्मांतर केले असल्याचे पुढे आले आहे.

छांगूर बाबा आणि त्याची सहकारी नसरीन यांच्यावर हिंदू आणि बिगर मुस्लीम समुदायातील लोकांचे फसवणूक करून धर्मांतर केल्याचा आरोप करण्यात येत आहे.

छांगूर बाबाचा उदय कसा झाला?

एकेकाळी उत्तर प्रदेशच्या ग्रामीण भागात अंगठ्या विकणारा छंगूर बाबा आज कोट्यवधींचा मालक आहे. मुंबई आणि सौदी अरेबियाचा दौरा केल्यानंतर त्याच्या आयुष्यात हे परिवर्तन घडल्याचे सांगितले जाते. मागच्या दशकात छंगूर बाबाने स्वतःला पीर बाबा किंवा हजरत जलालुद्दीन असल्याचे सांगण्यास सुरुवात केली.

वरिष्ठ पोलीस अधिकाऱ्यांनी दिलेल्या माहितीनुसार, छांगूर बाबा आणि त्यांच्या सहकाऱ्यांनी बलरामपूर आणि उत्तर प्रदेशमधील इतर जिल्ह्यात तसेच महाराष्ट्रातील पुण्यात अनेकठिकाणी मालमत्ता जमवल्या आहेत. ज्याची किंमत ३०० कोटी रुपयांहून अधिक आहे. आरोपी छांगूर बाबाकडे अनेक आलिशान गाड्या, बंगले आणि तीन डझन मालमत्ता आहेत. यातील बहुसंख्या मालमत्ता त्याचे सहकारी किंवा स्वयंसेवी संस्थांच्या नावाने नोंदणीकृत आहेत.

आणखी एका पोलीस अधिकाऱ्याने सांगितले की, छांगूर बाबा आणि त्याच्या सहकाऱ्यांनी मागच्या काही वर्षांत इस्लामिक देशात ५० हून अधिक दौरे केले आहेत. तसेच आरोपीच्या एनजीओशी संबंधित डझनभर बँक खात्यांमध्ये १०६ कोटी रुपयांच्या संशयास्पद व्यवहारामागे परदेशी निधी असल्याचा संशयही पोलिसांनी व्यक्त केला.

५ जुलै रोजी छांगूर बाबा आणि त्याची नसरीन उर्फ नीतू रोहरा यांना अटक करण्यात आली. भारतीय दंड संहिता आणि उत्तर प्रदेश अवैध धर्मांतर विरोधी कायदा, २०२१ नुसार या दोघांवर गुन्हे दाखल करण्यात आले आहेत. याच गुन्ह्यात नसरीनचा पती जमालुद्दीन ऊर्फ नवीन रोहरा आणि जलालुद्दीनचा मुलगा मेहबूब यांनाही एप्रिल महिन्यात अटक करण्यात आली होती. आणखी १४ आरोपींचा शोध एटीएसकडून घेतला जात आहे.