भारताची सांस्कृतिक डिप्लोमसी; पाकिस्तानातील ‘लिट फेस्ट’ला अर्थसहाय्य

भारत आणि पाकिस्तान या दोन्ही देशांमधील सध्याच्या तणावाच्या पार्श्वभूमीवर एका घटनेने अनेकांचे लक्ष वेधून घेतले आहे. नुकत्याच पार पडलेल्या कराची ‘लिट फेस्ट’च्या निमित्ताने भारत आणि पाकिस्तान यांच्यात अनोखी ‘सांस्कृतिक डिप्लोमसी’ पाहायला मिळाली. पाकिस्तानमध्ये १० ते १२ फेब्रुवारी  या काळात या लिटफेस्टचे आयोजन करण्यात आले होते. सांस्कृतिक क्षेत्रात केंद्र सरकारचे प्रतिनिधित्व करणाऱ्या इंडियन कौन्सिल फॉर कल्चरल रिलेशन्स (आयसीसीआर) ही संस्था या सोहळ्याची प्रायोजक असल्याची माहिती आता पुढे आली आहे.
काही दिवसांपूर्वी भारतामधील राजकीय पक्षांकडून पाकिस्तानी कलाकारांवर बंदी घालण्याच्या मागणीसाठी जोरदार आंदोलने करण्यात आली होती. या पार्श्वभूमीवर आयसीसीआरने पाकिस्तानी लिट फेस्टसाठी पुरविलेले प्रायोजकत्व अनेकांचे लक्ष वेधून घेत आहे. ‘टाईम्स ऑफ इंडिया’च्या वृत्तानुसार, सध्या भारत आणि पाकिस्तान यांच्यात संबंधात वितुष्ट आले असले तरी दोन्ही देशांतील लोकांचा संवाद तुटू न देण्यावर सरकारचा भर आहे. नरेंद्र मोदी यांच्या नेतृत्त्वाखाली आम्ही पाकिस्तानसह जगभरात भारतीय संस्कृतीचा ठसा उमटविण्यासाठी प्रयत्नशील असल्याचे ‘आयसीसीआर’चे महासंचालक अमरेंद्र खटुआ यांनी सांगितले आहे. आयसीसीआरने पहिल्यांदाच पाकिस्तानी ‘लिट फेस्ट’ला अर्थसहाय्य केल्याची माहितीही खटुआ यांनी दिली.