दहशतवादाच्या प्रश्नालाच अग्रक्रम देणार

दहशतवादाचा सामना करण्यासाठी कोणकोणती पावले पाकिस्तानकडून उचलली जातात, हा प्रश्न पाकिस्तान कसा हाताळते या मुद्दय़ांना यापुढे प्राधान्य देण्यात येणार असल्याचे भारताचे पाकिस्तानातील नवे उच्चायुक्त टी.सी.ए. राघवन यांनी स्पष्ट केले. वाघा सीमा ओलांडून राघवन पाकिस्तानात दाखल झाल्यानंतर प्रथमच त्यांनी पत्रकारांशी संवाद साधला. पाकिस्तानशी मैत्रीपूर्ण संबंध ठेवण्याची भारताची इच्छा आहे आणि याचा फायदा दोन्ही देशांच्या लोकांना होईल, असे राघवन म्हणाले.
दहशतवादाच्या संकटाने दोन्ही बाजूंना ग्रासले आहे. त्या संकटाचा सामना कसा करता येईल यावर मंथन होणे गरजेचे आहे, अशी अपेक्षा व्यक्त करतानाच व्यापारी आणि सांस्कृतिक देवाणघेवाणीद्वारे उभय पक्षीय संबंध सुधारतील अशी खात्री असल्याचे राघवन यांनी सांगितले.
गेल्याच महिन्यात भारताचे पाकिस्तानातील उच्चायुक्त शरत सबरवाल आपला कार्यकाळ अनेक मुदतवाढींसह पूर्ण करून भारतात परतले. त्यांच्या जागी गेल्या दशकात पाकिस्तानात उपउच्चायुक्तपद भूषविलेल्या राघवन यांची नेमणूक करण्यात आली. २६/११च्या दुर्घटनेनंतर, दहशतवादाच्या मुद्दय़ावरून भारत-पाकिस्तान संबंधात तणाव निर्माण झाला आहे. या प्रकरणाचा पाकिस्तानात सुरू असलेला खटला वेगाने चालविला जावा आणि दोषींना कठोरात कठोर शासन व्हावे अशी भारताची अपेक्षा आहे.
या पाश्र्वभूमीवर, पाकिस्तानी बुद्धिजीवी वर्गात तसेच राजकारण्यांमध्ये प्रचंड आदर कमावलेल्या, तसेच इस्लामाबादमध्ये मोठा मित्रवर्ग असलेल्या राघवन यांच्याकडून भारताला बऱ्याच अपेक्षा आहेत.