मध्य प्रदेशात एक अनोखा विवाह सोहळा पार पडला आहे. ४७ व्या वर्षी महिलेनं लिंगपरिवर्तन करून प्रेयशीसी लग्नगाठ बांधली आहे. विशेष विवाह कायद्याअंतर्गत अस्तित्व सोनी ( पूर्वी अलका ) यानं आस्था या प्रेयशीसी कौटुंबिक न्यायालयात विवाह केला आहे. या विवाहसोहळ्याला अस्तित्व सोनी आणि आस्थाच्या कुटुंबातील व्यक्ती उपस्थित होते.
इंदोर येथे अलका सोनी हिचा जन्म झाला होता. पण, काही वर्षानंतर अलकाला आपण स्त्री नसल्याची जाणीव झाली आणि पुरूष म्हणून वावरू लागला. अशातच ४७ व्या वाढदिवसाला अलकाने लिंगपरिवर्तन करून स्वत:चं नाव बदललं.
ऑक्टोबर महिन्यात तृतीयपंथी व्यक्तींना विवाह करण्याचा अधिकार सर्वोच्च न्यायालयानं दिला. त्यापार्श्वभूमीवर विवाह करण्याचा निर्णय अस्तित्व आणि आस्थानं घेतला.
विवाहानंतर अस्तित्व आणि आस्थानं आनंद व्यक्त केला आहे. आस्थानं सांगितलं, “या विवाहानंतर मी खूप आनंदीत आहे. अस्तित्वची पहिल्यांदा भेट त्याच्या घरी झाली होती. अस्तित्वची बहिण माझी मैत्रीण आहे. या भेटीनंतर नातं प्रेमात फुललं. गेल्या काही महिन्यांपासून दोघं लिव्ह इन रिलेशिपनमध्ये होतो. कुटुंबांच्या संमतीने विवाहाला मान्यता मिळाली.”
