जम्मू-काश्मीरमधील पुलवामा जिल्ह्यात लष्कराच्या जवानांबरोबर झालेल्या चकमकीत ‘लष्करे तैय्यबा’ या दहशतवादी संघटनेच्या स्थानिक कमांडरला ठार मारण्यात यश आले. मुहम्मद अफझल ऊर्फ तालिब असे या दहशतवाद्याचे नाव आहे. बुधवारी सकाळी सीमा सुरक्षा दलाच्या जवानांनी एका दहशतवाद्याला कंठस्नान घातले होते. त्यानंतर एका दहशतवाद्याला जिवंत पकडण्यातही यश आले होते.
पुलवामा जिल्ह्यातील अस्तान मोहल्ला भागात दहशतवादी असल्याची माहिती लष्कराच्या जवानांना मिळाल्यावर या संपूर्ण परिसराला वेढा घालण्यात आला. दहशतवाद्यांकडून जवानांवर गोळीबार करण्यात आल्यानंतर त्याला जवानांकडूनही चोख प्रत्युत्तर देण्यात आले. त्यामध्येच अफझल ठार झाला. यानंतर दहशतवादी आणि जवानांमध्ये काहीवेळ चकमक सुरूच होती. गेल्या वर्षापासून अफझल या भागात लष्करे तैय्यबासाठी कार्यरत होता. सुरक्षा दल अनेक दिवसांपासून त्याच्या मागावर होते.
दरम्यान, या घटनेनंतर या भागात दगडफेकीच्या किरकोळ घटना घडल्याची माहिती मिळाली आहे. संपूर्ण परिसरात कडक सुरक्षाव्यवस्था ठेवण्यात आली आहे.