Maithili Thakur : मैथिली ठाकूर अलीनगर मतदारसंघातून लढवणार निवडणूक, भाजपात प्रवेश केल्याच्या दुसऱ्याच दिवशी मिळालं तिकिट

अलीनगरचे विद्यमान आमदार यादव यांचं तिकिट कापलंं

अलीनगरचे विद्यमान आमदार मिश्रीलाल यादव यांचं तिकिट कापलं जाणं हे जवळपास निश्चित मानलं जातं होतं ते कापलं गेलं आहे. कारण मैथिली ठाकूर यांना अलीनगर या ठिकाणाहून तिकिट देण्यात आलं आहे. मैथिली ठाकूर भाजपात आल्याने त्यांच्या खांद्यावर भाजपाकडून प्रचाराची धुरा टाकली जाण्याचीही शक्यता आहे. मैथिली ठाकूर ही लोकप्रिय आहे आणि तिचा चाहता वर्ग फार मोठा आहे. याचा फायदा भाजपाला नक्कीच होऊ शकतो. बिहारच्या अलीनगरमधून आता मैथिली ठाकूरला तिकिट देण्यात आलं आहे. त्यामुळे बिहारच्या लोक संस्कृतीशी संबंधित प्रसिद्ध गायिका पहिल्यांदाच राजकारणाच्या आखाड्यात उतरली आहे.

मला बिहारच्या विकासात योगदान द्यायचं आहे-मैथिली ठाकूर

मैथिली ठाकूरने काही दिवसांपूर्वीच भाजपाचे वरिष्ठ नेते आणि राष्ट्रीय सरचिटणीस विनोद तावडे यांची भेट घेतली होती. ज्यानंतर मैथिली ठाकूर भाजपात येईल अशा शक्यता राजकीय वर्तुळात वर्तवल्या जात होत्या. ज्यानंतर मंगळवारीच तिचा भाजपात प्रवेश झाला. भाजपा नेत्यांशी माझी सकारात्मक चर्चा झाली आहे. आम्ही एनडीएला पाठिंबा देत आहोत. मी दिल्लीत कामानिमित्त राहते. मात्र माझा आत्मा आणि माझं मन बिहारशी जोडलं गेलं आहे. मी बिहारची सेवा करु इच्छिते आणि बिहारच्या विकासात माझं योगदान असलं पाहिजे असं मला वाटतं असं मैथिलीने म्हटलं होतं. भाजपा प्रवेशानंतर दुसऱ्याच दिवशी मैथिली ठाकूरला भाजपाने अलीनगरमधून उमेदवारी दिली आहे.

कोण आहे मैथिली ठाकूर?

मैथिली ठाकूर ही लोकप्रिय गायिका आहे. मैथिली तिच्या लोकसंगीत आणि तिच्या खास आवाजासाठी ओळखली जाते. मैथिलीच्या गाण्यांचे कार्यक्रम विदेशांतही होत असतात. २५ वर्षांची मैथिली ही सोशल मीडियावरही चांगलीच लोकप्रिय आहे. लहानपणापासूनच मैथिलीला गाणं आवडत होतं. ती पार्श्वगायिका तर आहेच. शिवाय तिने गाण्याचं शास्त्रीय शिक्षणही घेतलं आहे. मैथिलीने आत्तापर्यंत विविध भाषांमध्ये गाणी म्हटली आहेत. तिचे वडील रमेश ठाकूर आणि आई भारती ठाकूर हे दोघंही वादक आहेत. तसंच दोघंही संगीत शिक्षक म्हणूनही काम करतात.