ऑनलाईन क्रिकेट सट्टेबाजीच्या आमिषाने एका तरुणाला तब्बल १.५ कोटींचा फटका बसला आहे. या धक्क्यामुळे संबंधित तरुणाच्या पत्नीने घरातच आत्महत्या केली. टाईम्स ऑफ इंडियाने यासंदर्भातील वृत्त दिलं आहे. बंगळुरुतील चित्रदुर्ग येथे लघु पाटबंधारे विभागात सहाय्यक अभियंता असलेल्या दर्शन बाळूला ऑनलाईन क्रिकेट सट्टेबाजी लावण्याची सवय होती. याकरता त्याने कोट्यवधींचं कर्जही घेतलं होतं. परंतु, कर्ज वेळेत फेडता न आल्याने त्याला धमक्या येत होत्या. तसंच, बदनामी करण्याचीही धमकी देण्यात आली होती. या धमक्यांना घाबरून त्याच्या पत्नीने घरात आत्महत्या केली. यावेळी तिने तिच्याकडे पैसे मागणाऱ्या लोकांवर ठपका ठेवला. याप्रकरणी मृत महिलेच्या वडिलांनी १३ जणांविरोधात तक्रार दाखल केली आहे. पोलिसांनी दिलेल्या माहितीनुसार, रंजीताने एक सुसाईड नोट ठेवली आहे. यात तिने तिच्या पतीने कर्ज घेतल्याचं म्हटलं आहे. कर्ज फेडता न आल्याने छळ होत असल्याचंही तिने या लिहिलं. त्यामुळे तक्रारीच्या आधारावर १३ सशंयितांवर ४०६ अंतर्गत आत्महत्येच प्रवृत्त केल्याचा गुन्हा दाखल करण्यात आला आहे. त्यापैकी शिवू, गिरीश आणि व्यंकटेश यांना अटक करण्यात आली आहे. तर, अद्याप काही फरार आहेत. दर्शन आणि रंजिता यांना दोन वर्षांचा मुलगा आहे. दर्शनने क्रिकेट सट्टेबाजीत दीड कोटी गमावले होते. परंतु, त्याने त्यापैकी बहुतेक पैशांची परतफेड केली होती. तरीही त्याच्यावर ५४ लाखांचं कर्ज होतं, अशी प्रतिक्रिया दर्शनच्या सासऱ्यांनी टाईम्स ऑफ इंडियाला दिली. ते म्हणाले, माझा जावई निर्दोष आहे. तो क्रिकेट सट्टेबाजीत उतरण्यास तयार नव्हता. पण श्रीमंत होण्याचा एक सोपा मार्ग असल्याने त्याच्यावर संशयित आरोपींनी जबरदस्ती केली. सट्टेबाजीसाठी आर्थिक मदत करण्याचं आश्वासन दिलं. तसंच, काही कोरे धनादेशही त्याला देण्यात आले होते.
