Mumbai Cruise Drugs Case: शाहरुख खानच्या मुलाचा उल्लेख करत शशी थरुर म्हणाले, “थोडी तरी…”

शशी थरुर यांनी ट्वीट करत म्हटलं आहे की, “मी अमली पदार्थांचा समर्थक नाही आणि मी कधी त्यांचं सेवन करण्याचाही प्रयत्न केलेला नाही. पण ज्याप्रकारे शाहरुख खानच्या मुलाच्या अटकेवरुन त्यांच्या मागे लागलेले लोक त्यांच्या अडचणींवरुन खिल्ली उडवत आहेत ते पाहून वाईट वाटलं”. शशी थरुर यांनी यावेळी लोकांनी थोडी संवेदनशीलता बाळगली पाहिजे असंही म्हटलं आहे.

आर्यनसह आठ जणांना कोठडी

आर्यन खानसह सह मूनमून धमेचा, नूपुर सारिका, इस्मित सिंग, मोहक जैस्वाल, विक्रांत चोकेर, गोमित चोप्रा, अरबाझ मर्चंट यांना केंद्रीय अमलीपदार्थ विरोधी पथकाने (एनसीबी) अटक केली होती. न्यायालयाने या सर्व आरोपींना सोमवारी ७ ऑक्टोबरपर्यंत एनसीबी कोठडी सुनावली आहे.

आरोपी नियमित अमलीपदार्थ विक्री करणाऱ्यांच्या संपर्कात असल्याचे त्यांच्या मोबाइलवरील संदेशावरून स्पष्ट होत आहे. याशिवाय आर्यनच्या मोबाइलवरूनही महत्त्वपूर्ण संदेश सापडले आहेत, असा दावा एनसीबीने केला आहे. याप्रकरणी आणखी एका संशयिताला मुंबईतून अटक केली आहे.

या पार्टीला अरबाज मर्चंट, आर्यन खान आणि त्याची मित्रमंडळी अमलीपदार्थ घेऊन येणार असल्याची माहिती एनसीबीकडे होती. त्यानुसार एनसीबीचे विभागीय संचालक समीर वानखडे यांच्या मार्गदर्शनाखाली पथकाने सापळा रचला होता. शनिवारी आर्यन खान व अरबाज प्रवेशद्वारावर आले. त्यावेळी अरबाजकडे सहा ग्रॅम चरस सापडले. आर्यनकडे अमलीपदार्थ सापडले नाहीत, पण त्याने अमलीपदार्थांचे सेवन केले होते. त्यामुळे दोघांनाही क्रूझवर चढण्यापूर्वीच ताब्यात घेण्यात आले. तर मुनमुन हिच्या बँगेत पाच ग्रॅम चरस सापडले. मात्र या तिघांसोबत त्यांचे मित्र क्रूझवरच होते. त्यांच्याकडेही काही ड्रग्ज मिळण्याची शक्यता असल्याने एनसीबीचे अधिकारी क्रूझवर चढले. मात्र क्रूझ पाण्यात गेल्यानंतर दुपारी एनसीबीने तेथे उपस्थित आर्यनच्या संपर्कातील आणि उपस्थितांची झाडाझडती सुरू केली. त्यावेळी विक्रांतकडे ५ ग्रॅम एमडी, १० ग्रॅम कोकेन, इस्मितकडे १४ एमडीएमए, गोमित चोप्राकडे चार एमडीएमए गोळ्या व ३ ग्रम कोकेन, तर नूपुरकडे ४ ग्रॅम एमडीएमए सापडल्याचा एनसीबीचा दावा आहे. यातील आरोपी मोहक जैस्वाल याने आरोपींना अमलीपदार्थ पुरवल्याचे निष्पन्न झाल्यानंतर त्यालाही याप्रकरणी ताब्यात घेऊन एनसीबी कार्यालयात आणण्यात आले. संशयितांच्या रक्ताचे नमुने न्यायवैद्यक प्रयोगशाळेत पाठवण्यात आले आहेत.

नववी अटक

आरोपींच्या चौकशीतून मिळालेल्या माहितीच्या आधारावर एनसीबीने गोरेगाव येथून संशयित श्रेयस नायर याला अटक केली. ही या प्रकरणातील नववी अटक आहे. त्याच्याकडून अडीच ग्रॅम इक्स्टसी, ५३ ग्रॅम मेफेड्रॉन (एमडी) जप्त करण्यात आले आहे. आरोपींकडून मिळालेल्या माहितीतून आणखी दोन ग्रॅम चरसही एनसीबीला सापडले आहे. याप्रकरणी अनेक ठिकाणी एनसीबीची शोध मोहीम सुरू आहे.

मोबाइल संदेशात पुरावे सापडल्याचा दावा

आर्यन खानच्या व्हॉट्स अ‍ॅप चॅटवरून अमलीपदार्थांच्या खरेदीबद्दल काही संदेश आहेत. तसेच पैशांबाबतही बोलण्यात आल्याचे संदेश आहेत. या संदेशात आर्यन हशीशच्या खरेदीबद्दल चर्चा करत आहे. त्याची अधिक पडताळणी सुरू आहे, असा एनसीबीचा दावा आहे. दरम्यान, आर्यन फक्त अरबाजला ओळखत होता. इतर अटक आरोपींशी त्याचा संबंध नाही. अरबाजकडून एनसीबीने सहा ग्रॅम चरस जप्त केले आहे, अशी बाजू बचाव पक्षाकडून मांडण्यात आली. एनसीबीच्या तपासात इतर आरोपीही अमलीपदार्थ विक्रेत्यांच्या नियमित संपर्कात असल्याचे निष्पन्न झाले आहे.