Operation Akhal: दक्षिण काश्मीरच्या कुलगाम जिल्ह्यात रात्री सुरक्षा दलाबरोबर झालेल्या चकमकीत एका अज्ञात दहशतवाद्याचा खात्मा करण्यात आला आहे. भारतीय सैन्यदलाने ही माहिती दिली आहे. कुलगाममधील अखल गावात अतिरेकी असल्याची गुप्त माहिती मिळाल्यानंतर सुरक्षा दलाने शुक्रवारी सायंकाळी या परिसरात घेराबंदी करत शोध मोहीम राबवली असता चकमक सुरू झाली. जम्मू-काश्मीर पोलीस, भारतीय लष्कर आणि निमलष्कर दलाच्या संयुक्त पथकाने ही कारवाई केली.
भारतीय सैन्यदलाच्या चिनार कॉर्प्स या एक्स हँडलवरून सदर कारवाईची माहिती देण्यात आली आहे. “रात्रभर अधूनमधून गोळीबार सुरू होता. “सैन्यदलाने अतिरेक्याच्या गोळीबाराला प्रत्युत्तर दिले. यात एका दहशतवाद्याला ठार करण्यात यश आले आहे”, असे चिनार कॉर्प्सने म्हटले आहे.
पोलिसांमधील सूत्रांनी सांगितले की, या भागात दहशतवाद्यांचा एक मोठा गट असल्याची माहिती सुरक्षा दलांना मिळाली होती. आमच्या माहितीनुसार या भागात चार ते पाच दहशतवादी लपून बसल्याची माहिती आहे, असे एका पोलीस अधिकाऱ्याने सांगितले.
आठवड्याभरात काश्मीरमध्ये घडलेली ही दुसरी मोठी आणि महिन्याभरातील तिसरी गोळीबाराची घटना आहे. गेल्याच आठवड्यात श्रीनगरच्या बाहेरील डोंगराळ भागात झालेल्या चकमकीत तीन पाकिस्तानी दहशतवादी मारले गेले होते.
केंद्रीय गृहमंत्री अमित शाह यांनी संसदेत माहिती देताना सांगितले होते की, २२ एप्रिल रोजी पहलगाम येथे पर्यटकांवर झालेल्या हल्ल्यात मारल्या गेलेल्या तीन अतिरेक्यांचा समावेश होता. पहलगामच्या बैसरन कुरणावर २५ पर्यटक आणि एका स्थानिक रहिवाशाचा मृत्यू झाला होता.
ऑपरेशन शिवशक्ती, ऑपरेशन महादेव आणि आता ऑपरेशन अखल
भारतीय सुरक्षा दलाने जुलैच्या अखेरीस ऑपरेशन शिवशक्ती दरम्यान जम्मू-काश्मीरच्या पूंछ जिल्ह्यातील नियंत्रण रेषेजवळ सीमेतून घुसखोरी करणाऱ्या दोन दहशतवाद्यांचा खात्मा केला होता. त्यानंतर २८ जुलै रोजी श्रीनगरच्या लिडवास भागात झालेल्या चकमकीत तीन पाकिस्तानी दहशतवादी ठार केले होते. या मोहिमेला ऑपरेशन महादेव असे नाव देण्यात आले.
त्यानंतर शुक्रवारी सायंकाळी राबविलेल्या मोहिमेला ऑपरेशन अखल असे नाव चिनार कॉर्प्सने दिले आहे.
