Parliament Monsoon Session Hightlights: भारताने पाकिस्तानचे १००० क्षेपणास्त्र आणि ड्रोन्स हवेतच नष्ट केले – पंतप्रधान मोदी

भारत आता आत्मनिर्भर होत आहे. पण काँग्रेसला मात्र मुद्द्यांसाठी पाकिस्तानवर अवलंबून राहावं लागत आहे. काँग्रेस पाकिस्तानकडून मुद्दे आयात करत आहे. काँग्रेस आणि त्यांचे मित्र पक्ष दुर्दैवाने पाकिस्तानच्या अपप्रचाराचे प्रवक्ते बनले आहेत, असे पंतप्रधान नरेंद्र मोदी यांनी लोकसभेत म्हटले.

भारताने कोणत्याही जागतिक नेत्याच्या सांगण्यावरून शस्त्रविराम केलेला नाही. ९ मे रोजी रात्री अमेरिकेच्या उपराष्ट्रपतींनी माझ्याशी चर्चा करण्याचा प्रयत्न केला. मी काही वेळाने त्यांच्याशी बोललो. उपराष्ट्राध्यक्षांनी मला सांगितले की, पाकिस्तान मोठा हल्ला करणार आहे. मी त्यांना ठणकावून सांगितले की, पाकिस्तानने असा काही प्रयत्न केला तर त्यांना महागात पडेल. आम्ही मोठा हल्ला करून त्यांना उत्तर देऊ, असे पंतप्रधान नरेंद्र मोदींनी लोकसभेत सांगितले.

ऑपरेशन सिंदूरदरम्यान जगातील कोणत्याही देशाने भारताला स्वसरक्षणाच्या कारवाईपासून रोखले नाही. संयुक्त राष्ट्रातील १९० देशांपैकी फक्त केवळ तीन देशांनी पाकिस्तानच्या बाजूने विधान केले. पण इतर सर्व देशांचे समर्थन भारताला लाभले. जगाचे समर्थन आपल्याला मिळाले. पण दुर्दैव हे आहे की, काँग्रेसचे समर्थन मिळू शकले नाही.

https://www.youtube.com/watch?v=P1N0un5C8e0

ऑपरेशन सिंदूर दरम्यान देशातील जनतेने मला आशीर्वाद आणि पाठिंबा दिला. याबद्दल सर्व जनतेचे आभार आणि अभिनंदन व्यक्त करतो. २२ एप्रिल रोजी पहलगाम येथे ज्याप्रकारे क्रूर घटना घडली. दहशतवाद्यांनी धर्म विचारून निरपराध लोकांना गोळ्या झाडल्या. हा क्रूरतेचा कळस होता.

भाजपाचे खासदार डॉ. संजय जयस्वाल यांनी लोकसभेत ऑपरेशन सिंदूरवर बोलत असताना म्हटले की, विरोधक काही बोलत असले तरी आम्ही नूर खान हवाई तळावर हल्ला केला, याचा अर्थ आम्ही किराणा हिल्सवरही हल्ला करू शकलो असतो, पाकिस्तानच्या पंतप्रधानांच्या ठिकाणावरही हल्ला करू शकलो असतो.

ऑपरेशन सिंदूरदरम्यान भारतीय सशस्त्र दलाकडून कोणतीही रणनीतीक चूक झाली नसून भारताच्या नेतृत्वाकडून मात्र चुका झाल्या, असे लोकसभेचे विरोधी पक्षनेते राहुल गांधी म्हणाले. राजकीय नेतृत्वाच्या चुकांमुळे हवाई दलाची विमाने पाडली गेली, असेही राहुल गांधी म्हणाले.

भारत-पाकिस्तानमध्ये शस्त्रविराम झाल्यानंतर अमेरिकेचे राष्ट्राध्यक्ष डोनाल्ड ट्रम्प यांनी आपणच शस्त्रविराम केल्याचे २९ वेळा सांगितले. पण पंतप्रधान मोदींनी एकदाही याचे खंडन केले नाही. माजी पंतप्रधान इंदिरा गांधीच्या तुलनेत त्यांच्यात ५० टक्के जरी दम असेल तर ते आज संसदेत डोनाल्ड ट्रम्प खोटे बोलत होते, हे सांगतील, असे आव्हान राहुल गांधी यांनी दिले.

लोकसभेत ऑपरेशन सिंदूरवर बोलण्याचा आजचा दुसरा दिवस आहे. लोकसभेचे विरोधी पक्षनेते राहुल गांधी हे पहलगाम हल्ला आणि ऑपरेशन सिंदूरवर बोलत असताना त्यांनी हल्ल्याचा निषेध केला.

ऑपरेशन सिंदूरवर संसदेत चर्चा सुरू आहे. यावेळी काँग्रेसचे राष्ट्रीय अध्यक्ष मल्लिकार्जुन खरगे यांनी पंतप्रधान मोदींवर टीका केली. ते म्हणाले, भाजपाचे खासदार सैन्य दलाचा अवमान करत होते, त्यावेळी पंतप्रधान मोदी गप्प का राहिले. तसेच भारताचे पाच लढाऊ विमान पाडण्यात आले, असे ट्रम्प म्हणाले. त्यावरही मोदी शांत का? असाही सवाल त्यांनी उपस्थित केला.

जम्मू-काश्मीरच्या पहलगाममधील बैसरन व्हॅलीमध्ये सैनिकांची सुरक्षा व्यवस्था का तैनात नव्हती?, असा सवाल खासदार प्रियांका गांधी यांनी लोकसभेत भाषण करत असताना उपस्थित केला. तसेच पहलगाममध्ये हल्ला होणार आहे, याबाबतची गुप्तवार्ता यंत्रणांना कशी मिळाली नाही, असेही त्या म्हणाल्या.

अमित शाह लोकसभेत म्हणाले की, आज चीन संयुक्त राष्ट्राच्या सुरक्षा परिषदेचा सदस्य आहे आणि भारत बाहेर आहे. मोदीजी भारताचा या परिषदेत समावेश करण्यासाठी प्रयत्नशील आहेत. जवाहरलाल नेहरूंमुळेच हे झाले. भारताचे जवान डोकलाम येथे चीनला भीडत होते, तेव्हा राहुल गांधी चिनी दूतावासांबरोबर बैठक घेत होते. गांधी कुटुंबियांना फार पूर्वीपासून चीनचा पुळका आहे.

अमित शाह लोकसभेत म्हणाले की, १९६२ च्या चीनविरोधातील युद्धात पंडीत जवाहरलाल नेहरू यांनी आकाशवाणीवर भाषण करत असताना आसामला निरोप दिला होता. याचप्रकारे १९४८ च्या युद्धात भारतीय लष्कराने पाकिस्तानवर नियंत्रण मिळवत वरचढ ठरले असतानाही नेहरूंनी एकतर्फी युद्धबंदी केली.