व्यापार करारासाठी मोदी, ट्रम्प यांची चर्चा?

द्विपक्षीय व्यापार करारासाठी वाटाघाटी सुरू कराव्यात, असे निर्देश मोदी आणि ट्रम्प यांनी आपापल्या वरिष्ठ अधिकाऱ्यांना फेब्रुवारी महिन्यात दिले होते. त्यानंतर वाटाघाटीच्या पाच फेऱ्या पूर्ण झाल्या आहेत. मात्र, व्यापार कराराला अंतिम स्वरूप मिळू शकलेले नाही. अमेरिकेचे भारतातील नियोजित राजदूत सर्गेई गोर हे ट्रम्प यांचे विश्वासू मानले जातात. ते या वाटाघाटींमध्ये महत्त्वाची भूमिका बजावू शकतात अशी आशा अधिकाऱ्यांना वाटत आहे.

हा करार ऑक्टोबर किंवा नोव्हेंबरपर्यंत होणे अपेक्षित होते. मात्र, अमेरिकेने लादलेले प्रचंड आयातशुल्क आणि कृषी व दुग्धजन्य उत्पादनांच्या समावेशाबद्दलचे मतभेद यामुळे हा करार अद्याप अपेक्षित गतीने पुढे गेलेला नाही. सध्या दोन्ही देशांदरम्यान १९१ अब्ज डॉलर इतका व्यापार होतो, तो २०३०पर्यंत ५०० अब्ज डॉलरपर्यंत वाढवण्याचे उद्दिष्ट आहे.