pm Narendra modi semiconductor semicon india developing in challenging situation आर्थिक स्वार्थाच्या आव्हानातही भारताची प्रगती, पंतप्रधान नरेंद्र मोदी यांचे प्रतिपादन

देशाची वेगाने प्रगती होत असून तिसरी जागतिक अर्थव्यवस्था म्हणून भारताचे स्थान अधिक पक्के होत असल्याची भावना पंतप्रधानांनी मंगळवारी व्यक्त केली.

Written by लोकसत्ता टीम

नवी दिल्ली

September 3, 2025 06:06 IST

आर्थिक स्वार्थाच्या आव्हानातही भारताची प्रगती, पंतप्रधान नरेंद्र मोदी यांचे प्रतिपादन (photo credit - Narendra modi/X)

नवी दिल्ली : आर्थिक स्वार्थाने निर्माण केलेल्या आव्हानांनी जगभरातील अर्थव्यवस्थांमध्ये चिंतेचे वातावरण असताना भारतीय अर्थव्यवस्थेने चालू आर्थिक वर्षाच्या पहिल्या तिमाहीत ७.८ टक्क्यांची वाढ नोंदवली, असे सांगत पंतप्रधान नरेंद्र मोदी यांनी अमेरिकेकडून वाढत असलेल्या आर्थिक दबावाचा भारताला फटका बसला नसल्याचे सूचित केले.

देशाची वेगाने प्रगती होत असून तिसरी जागतिक अर्थव्यवस्था म्हणून भारताचे स्थान अधिक पक्के होत असल्याची भावना पंतप्रधानांनी मंगळवारी व्यक्त केली. ‘सेमिकॉन इंडिया’च्या उद्घाटनानंतर बोलताना पंतप्रधानांनी ‘जगाचा भारतावर विश्वास असून भारताच्या साथीने सेमिकंडक्टर क्षेत्राचा भविष्यकाळ घडवण्यासाठी जग तयार आहे’ असे विधान केले.

अमेरिकेने भारतावर लादलेल्या आयातशुल्काच्या पार्श्वभूमीवर चीन आणि जपानच्या दौऱ्यावरून पंतप्रधान नरेंद्र मोदी सोमवारीच परतले. ‘सेमिकॉन इंडिया’च्या परिषदेत बोलताना पंतप्रधानांनी तोच धागा पकडून अमेरिकेच्या शुल्कवाढीने भारतावर कोणताही परिणाम होणार नाही, असे अप्रत्यक्षपणे सुचित केले. ते म्हणाले,‘काही दिवसांपूर्वीच चालू आर्थिक वर्षाच्या पहिल्या तिमाहीचे आकडे आले. त्यात भारताने सर्व अपेक्षा, आशा आणि अंदाज याहून कितीतरी चांगली कामगिरी केली आहे. एकीकडे जगभरातील अर्थव्यवस्थांमध्ये चिंतेचे वातावरण आहे. आर्थिक स्वार्थाच्या नीतीने सगळ्यांसमोर आव्हाने निर्माण केली आहेत. असे असताना भारताने ७.८ टक्क्यांचा विकासदर गाठला आहे. ही प्रगती सर्वच क्षेत्रात असून याद्वारे सरकार, उद्योगक्षेत्र आणि जनता यांच्यात नवी ऊर्जा संचारली आहे.’

हेही वाचा

Shehbaz Sharif : “रशिया-भारत संबंधांचा आम्ही आदर करतो”, शाहबाज शरीफ पुतिन यांच्याशी चर्चा करताना काय म्हणाले? व्हिडीओ समोर

सेमिकंडक्टर क्षेत्रातील भारताच्या प्रगतीचा आढावा घेताना ‘सुधारणा, कामगिरी आणि बदल’ हा मंत्र देशाला उपयुक्त ठरल्याचे मोदी म्हणाले. भारत आता सेमिकंडक्टर मोहिमेच्या दुसऱ्या टप्प्यात प्रवेश करत असून नव्या पिढीचे युग आता अवतरत आहे, असे त्यांनी सांगितले. केंद्र सरकारचे धोरण अल्पकालीन संकेतांचे नसून दीर्घकालीन संकल्पाचे आहे, असे सांगताना येत्या काळात संपूर्णे जग ‘डिझाइन इन इंडिया, मेड इन इंडिया’ म्हणेल, असा आशावाद मोदींनी व्यक्त केला.

टाळ्या का वाजत आहेत?

परिषदेचे उद्घाटन पंतप्रधान मोदी यांच्या हस्ते पार पडल्यानंतर संपूर्ण सभागृह टाळ्यांच्या कडकडाटात दणाणून गेले. त्यावर टिप्पणी करत मोदींनी सभागृहाला विचारले, ‘‘मी चीन, जपानच्या दौऱ्यावर गेलो होतो, म्हणून टाळ्या वाजवताय की परत आलो म्हणून?’’ त्यांच्या या विधानाने सभागृहात हशा पिकला. अमेरिकेवर दबाव निर्माण करण्याच्या प्रयत्नांचा भाग म्हणून मोदी यांनी चीन आणि जपानचा दौरा केल्याचे बोलले जात आहे. याबद्दल उद्योगक्षेत्रातून समाधान व्यक्त होत आहे. पंतप्रधानांच्या टिप्पणीमागे तोच संदर्भ होता.