कोविडच्या शेवटच्या लाटेपासून तीन भावंडांना घरातच ठेवले कोंडून, निर्दयी आई-बापाकडून मुलांवर चार वर्षे अत्याचार

स्कायन्यूजच्या वृत्तानुसार, २०२१ पासून मुलांना घरात बंदिस्त करण्यात आले होते. या प्रकरणी आरोपी पालकांच्या घराच्या शेजारी राहणाऱ्यांनी मुलांच्या अनुपस्थितीबद्दल तक्रार दाखल केल्यानंतर स्पेनमधील पोलिसांनी याचा तपास सुरू केला होता. यानंतर पोलिसांना आढळून आले की, ऑक्टोबर २०२१ मध्ये या कुटुंबाने हे घर भाड्याने घेतले होते. घर भाड्याने घेताना त्यांनी फक्त आरोपी वडिलांचे नाव नोंदवले होते. स्थानिकांनी अधिकाऱ्यांना असेही सांगितले की, डिसेंबर २०२१ पासून त्यांनी कोणालाही घरात प्रवेश करताना किंवा बाहेर पडताना पाहिले नाही.

२८ एप्रिल रोजी जेव्हा पोलीस अधिकारी आरोपींच्या घरी गेले तेव्हा पीडित मुलांच्या आईने पोलिसांना, मुले आजारी असल्याने शांतता राखा असे सांगितले. यानंतर पोलिसांनी घराची तपासणी केल्यानंतर, त्यांना घरात कचरा आणि मोठ्या प्रमाणात औषधे आणि मास्क तसेच इतर वस्तू आढळल्या.

“आम्ही घरात गेलो तेव्हा मुले भयानक स्थितीत आढळली. ते अगदीच भयानक दृश्य होते. मुले कुपोषित नव्हती, कारण त्यांना खायला दिले जात होते. पण ते खूप अस्वच्छ होते. ते वास्तवापासून पूर्णपणे तुटलेले होते. यानंतर जेव्हा आम्ही त्यांना घराबाहेर, बागेत नेले, तेव्हा ते बाहेर यायला तयार होत नव्हते. पण, जेव्हाल त्यांना बागेत नेले तेव्हा त्यांना एक गोगलगाय दिसली यामुळे ते घाबरले,” असे एका पोलिस अधिकाऱ्याने स्कायन्यूजला सांगितले.

एका पत्रकार परिषदेत बोलताना, ओविएडोचे पोलीस प्रमुख जेवियर लोझानो यांनी या घराचे वर्णन “हाऊस ऑफ हॉरर” असे केले. “आम्ही तीन मुलांना त्यांचे जीवन परत दिले असून, हे भयानक घर उद्ध्वस्त केले आहे.”