प्रभाकरनची LTTE अजूनही सक्रीय? खातम्याच्या एक तपानंतर तामिळनाडू पोलिसांची मोठी कारवाई; आंतरराष्ट्रीय नेटवर्कचा पर्दाफाश!

तामिळनाडू पोलिसांनी चेन्नई विमानतळावर एका महिलेला अटक केली असून ती श्रीलंकन रहिवासी असल्याची बाब समोर आली आहे.

prabhakaran ltte
प्रभाकरन (संग्रहीत छायाचित्र)

जवळपास एक तपापूर्वी अर्थात २००९ साली एलटीटीईचा म्होरक्या प्रभाकरनसोबतच या संपूर्ण संघटनेच्या मुसक्या आवळण्यात सुरक्षा यंत्रणांना यश आलं होतं. त्यामुळे दक्षिण भारतात, विशेषत: तामिळनाडू आणि आसपासच्या भागातील नागरिकांनी सुटकेचा नि:श्वास टाकला होता. मात्र, त्यानंतर तब्बल १२ वर्षांनंतर पुन्हा एकदा या संघटनेनं डोकं वर काढल्याचं नुकत्याच झालेल्या एका कारवाईवरून स्पष्ट झालं आहे. तामिळनाडू पोलिसांनी एका गँगचा पर्दाफाश केला असून या संघटनेच्या पुनरुज्जीवनासाठी ही टोळी पैसा उभा करत असल्याची धक्कादायक बाब यातून समोर आली आहे. यासंदर्भात एका महिलेला पोलिसांनी अटक केली असून तिच्या माध्यमातून या सगळ्या प्रकरणाचा उलगडा झाला आहे.

पोलिसांनी दिलेल्या माहितीनुसार, चेन्नई विमानतळावर पोलिसांनी मेरी फ्रान्सिस्को नावाच्या ५१ वर्षीय महिलेला अटक केली आहे. ही महिला श्रीलंकेची रहिवासी असून अनेक वर्षांपूर्वी ती कॅनडामध्ये स्थायिक झाली आहे. ही महिला मुंबईकडे जाणाऱ्या विमानात बसण्याच्या तयारीत असतानाच पोलिसांनी तिला अटक केली. या महिलेकडे बनावट कागदपत्रांच्या सहाय्याने तयार करण्यात आलेला भारतीय पासपोर्ट देखील सापडला आहे.

कशी होती मोडस ऑपरेंडी?

या महिलेनं चौकशीदरम्यान त्यांची गँग कसं काम करत होती, याची सविस्तर माहिती दिली आहे. देशभरातील बँकांमध्ये कुणीही दावा न केल्यामुळे पडून असलेला पैसा या लोकांच्या निशाण्यावर होता. जर्मनी आणि स्वित्झर्लंडमध्ये राहणाऱ्या LTTE च्या दोन हितचिंतकांकडून हा पैसा हस्तगत करण्यासाठी प्रयत्न केले जात आहेत. हे दोघे भारताबाहेर कॅनडा, सिंगापूर आणि मलेशियामध्ये राहणाऱ्या लिट्टेच्या इतर हितचिंतकांच्या गटाचे सदस्य आहेत. बनावट कागदपत्रांच्या सहाय्याने हा पैसा काढून भारत आणि विदेशातील निरनिराळ्या बँक खात्यांमध्ये हा पैसा वर्ग करण्यासाठी या गटाकडून काम केलं जातं. संघटनेच्या कामासाठी हा पैसा वापरण्याची त्यांची योजना होती.

मुंबईत होणार होता कोट्यवधींचा व्यवहार!

फ्रान्सिस्को या महिलेवर मुंबईतील फोर्ट परिसरात असलेल्या इंडियन ओव्हरसीज बँकेच्या एका जॉइंट अकाउंटमधून कोट्यवधी रुपये काढण्याची जबाबदारी सोपवण्यात आली होती. त्यासाठीच ती मुंबईला निघाली होती. डेन्मार्क आणि स्वित्झर्लंडमध्ये राहणाऱ्या तिच्या दोघा साथीदारांच्या सांगण्यावरूनच ती मुंबईला निघाली होती. हा पैसा LTTE साठी वापरला जाणार होता, असं या महिलेनं पोलिसांना सांगितलं आहे.

मराठीतील सर्व देश-विदेश ( Desh-videsh ) बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.

Web Title: Prabhakaran ltte still active tamilnadu police burst fund raising racket for movement pmw

Next Story
अमेरिका-कॅनडा सीमेवर गारठून मृत्यू झालेल्या त्या भारतीयांची ओळख पटली; मृतांमध्ये तीन वर्षाच्या बाळाचाही समावेश
ताज्या बातम्या
फोटो गॅलरी