मोदी-जिनपिंग आज चर्चा, पंतप्रधान सात वर्षांनी चीनच्या दौऱ्यावर

मोदी आणि जिनपिंग यांच्या रविवारी होणाऱ्या बैठकीत आर्थिक संबंधांचा आढावा घेतला जाईल, तसेच पूर्व लडाख सीमेवर निर्माण झालेला तणाव कमी करून द्विपक्षीय संबंध सामान्य करण्यासाठी उपाययोजनांवर चर्चा केली जाईल अशी अपेक्षा आहे. जागतिक आर्थिक स्थैर्यासाठी भारत आणि चीनने एकत्र काम करणे आवश्यक असल्याचे मत पंतप्रधानांनी व्यक्त केले आहे. दरम्यान, पंतप्रधान मोदी यांनी तियान्जिन येथे पोहोचल्यानंतर त्यांचे तेथील भारतीय समुदायाने तसेच चिनी नागरिकांना उत्साहाने स्वागत केले. मोदींच्या सन्मानार्थ चिनी कलाकारांनी भारतीय नृत्य-गायन आणि वादन कला सादर केल्या.

त्यापूर्वी, मोदी यांच्या जपान दौऱ्यामध्ये दोन्ही देशांदरम्यान १३ महत्त्वाचे करार करण्यात आले. तसेच द्विपक्षीय सहकार्याने अनेक उपक्रम सुरू करण्याची घोषणा करण्यात आली. हा दौरा रचनात्मक परिणामामुळे लक्षात राहील असे मत मोदी यांनी जपानमधून निघताना व्यक्त केले.