नवी दिल्ली : ओ. पी. जिंदाल ग्लोबल युनिव्हर्सिटीतील विधि शाखेच्या प्राध्यापक व स्त्रीवादी लेखिका डॉ. समीना दलवाई यांच्याविरोधात महिलांच्या प्रतिष्ठेची हानी आणि धर्माच्या आधारावर विद्यार्थ्यांमध्ये भेदभाव केल्याचा गुन्हा दाखल झाला आहे. हरियाणा महिला आयोगाच्या शैक्षणिक क्षेत्रातील या नाहक हस्तक्षेपाचा जागतिक स्तरावरून तीव्र निषेध होऊ लागला आहे.
राष्ट्रीय तसेच, आंतरराष्ट्रीय स्तरावरील ४००हून अधिक नामवंत बुद्धिजीवी, प्राध्यापक, अभ्यासक व इतिहास संशोधकांनी डॉ. समीना दलवाई यांना जाहीर पाठिंबा दिला आहे. ‘मुस्लिम ओळख व विशिष्ट राजकीय विचारसरणीमुळे डॉ. समीना दलवाई यांना जाणीवपूर्वक लक्ष्य केले जात असून त्यांची होणारी ही छळवणूक तातडीने थांबवावी व गुन्हा रद्द करावा’, अशी मागणी या मान्यवरांनी रविवारी जाहीर निवेदनाद्वारे केली आहे.
हेही वाचा >>>बांगलादेशात कमी मतदान; विरोधी पक्षांच्या बहिष्काराचा फटका
वर्गातील शिकवण्याच्या पद्धतीविरोधात पहिल्यांदाच प्राध्यापकाविरोधात गुन्हा दाखल झाला असून या प्रकरणामुळे शैक्षणिक क्षेत्रातील खुली चर्चा करण्याच्या स्वातंत्र्यावर गदा येत असल्याची भीती व्यक्त होत आहे. ‘हुकुमशाही प्रवृत्तीच्या राजवटी बुद्धिवादी मूल्यमापनात्मक विचारसरणी आणि त्याला प्रोत्साहन देणाऱ्या बुद्धिजीवींना घाबरतात. भारतातील विद्यापीठांवर सातत्याने होत असलेल्या अशा हल्ल्यांच्या मालिकेत प्रा. दलवाईंविरोधातील कारवाई हे ताजे उदाहरण म्हणता येईल’, असे स्पष्ट मत निवेदनात व्यक्त करण्यात आले आहे.
एकाही विद्यार्थ्यांने तक्रार केली नसतानाही राज्य महिला आयोगाच्या तक्रारीवरून डॉ. दलवाईंविरोधात २२ डिसेंबरला कलम ५०९ अंतर्गत गुन्हा नोंदवण्यात आला आहे.
