पंजाब नॅशनल बँकेतील आर्थिक घोटाळा, अमेरिका-चीनमधील व्यापार युद्ध, शेअर्सवर आकारण्यात येणाऱ्या LTCG टॅक्सवरुन असलेली अस्वस्थतता या सर्व प्रतिकुल परिस्थितीतून भारतीय शेअर बाजार आता बऱ्यापैकी सावरला आहे. मागच्या महिन्याभरापासून भारतीय शेअर्सच्या मुल्यामध्ये सातत्याने वाढ झाली आहे. पाचवर्षांचा विचार करता चीन आणि जपानच्या तुलनेत देशातंर्गत शेअर बाजाराने चांगली कामगिरी केली आहे. ऑटोमोबाईल क्षेत्रातील कंपन्यांच्या शेअर्सच्या मुल्यामध्ये घसघशीत वाढ झाली आहे. रिको ऑटो इंडस्ट्रीज लिमिटेड या वाहन क्षेत्रातील कंपनीच्या प्रगतीपुस्तकावर नजर टाकली तर लक्षात येईल कि, पाचवर्षांच्या आत या कंपनीने गुंतवणूकदारांना दामदुप्पट फायदा मिळवून दिला आहे. रिको ऑटो इंडस्ट्रीजच्या शेअर्समध्ये १८०० टक्के वाढ झाली आहे. पाचवर्षांपूर्वी ४.३ रुपये मुल्य असलेल्या एका शेअरची किंमत आज ८१.८५ रुपये आहे. म्हणजे पाचवर्षांपूर्वी तुम्ही या कंपनीच्या शेअर्समध्ये १० हजार रुपये गुंतवणूक केली असेल तर आज या शेअर्सचे मुल्य १ लाख ९० हजार ३४९ रुपये आहे. कंपनीने १ रुपये फेसव्हॅल्यु असलेल्या शेअरवर ५ रुपये डिव्हिडंड वाटला आहे.
