“भारतीय व्यावसायिकांवर आमचा विश्वास” अदाणी समूहावर हिंडेनबर्गच्या आरोपांनंतर इस्रायलच्या ‘या’ मंत्र्यांचं वक्तव्य

या वर्षी अदाणी समूहाने अदाणी समूहाने इस्रायलचे हैफा हे बंदर $1.2 अब्जांना विकत घेतलं. हिंडेनबर्गचा अहवाल आल्यानंतर झालेली ही डील होती. अदाणी समूहावर जे आरोप झाले त्याची आम्हाला चिंता वाटत नाही असं बरकत यांनी स्पष्ट केलं आहे. बरकत म्हणाले की, “इस्रायलने भारतीय कंपनीला दोन बंदरांपैकी एक विकत घेण्याची संमती देणं हाच भारतीय व्यावसायिकांवरचा आमचा विश्वास दर्शवतो. हिंडेनबर्गच्या अहवालात काय आहे, अदाणी समूहावर काय आरोप झाले आहेत? याच्याशी आम्हाला काही घेणं देणं नाही.”

भारतातल्या गुंतवणूकदारांचं स्वागत करण्यासाठी इस्रायल सज्ज आहे. अधिकाधिक गुंतवणूक आमच्याकडे झाली पाहिजे. आमच्या देशातल्या लोकांच्या हिताची ही बाब आहे. आम्ही हे जे पाऊल उचललं आहे त्यानंतर भारतातले गुंतवणूदार इस्रायलमध्ये येतील असा आम्हाला विश्वास वाटतो असंही बरकत यांनी ANI च्या मुलाखतीत सांगितलं आहे.

इस्रायलचे अर्थमंत्री मीर बरकत हे भारतात आले आहेत. इस्रायलच्या लोकांना भारतात सुरक्षित राहणं आणि व्यवसाय करणं सुरक्षित वाटतं आहे. इस्रायलींचे भारतीयांवर प्रेम आहे आणि भारतीयांनाही इस्रायली आवडतात. आम्हाला सुरक्षित वातावरणात व्यवसाय करणं आवडतं आणि भारतात तसं वातावरण आहे असंही त्यांनी म्हटलं आहे.