पश्चिम बंगालमध्ये मतदानादरम्यान हिंसाचार, ५ जणांचा मृत्यू

नेमकं घडलं काय?

पश्चिम बंगालमध्ये ४४ जागांसाठी आज सकाळी मतदान सुरू झालं. मात्र, सकाळच्या सुमारासच सितालकुची भागातल्या एका मतदान केंद्रावर रांगेत उभ्या असलेल्या आनंद बर्मन नावाच्या युवकावर काही अज्ञातांनी गोळीबार केला. यामध्ये त्याचा जागीच मृत्यू झाला. त्यानंतर तृणमूल काँग्रेस आणि भाजपाचे कार्यकर्ते घटनास्थळावर दाखल झाले आणि तिथेच त्यांच्यामध्ये बाचाबाची सुरू झाली. काही वेळानंतर सुरक्षा कर्मचाऱ्यांनी जमावाला पांगवलं.

दुपारी घडली दुसरी घटना!

सकाळी हा प्रकार घडल्यानंतर सितालकुची भागामध्येच असलेल्या मतदान केंद्र क्रमांक १२६ वर पुन्हा एकदा तृणमूल काँग्रेस आणि भाजपाचे कार्यकर्ते एकमेकांसोबत भिडले. सुरक्षा कर्मचाऱ्यांनी वारंवार सांगून देखील जमाव ऐकत नव्हता. निवडणूक आयोगाने दिलेल्या माहितीनुसार त्यांना थांबवण्याचा प्रयत्न करणाऱ्या केंद्रीय सुरक्षा पथकाच्या जवानांवरची शस्त्र हिसकावून त्यांच्यावर हल्ला करण्याचा प्रयत्न जमावातील काहींनी करण्याचा प्रयत्न केला. त्यामुळे नाईलाजाने स्वसुरक्षेसाठी आक्रमक झालेल्या व्यक्तींवर जवानांना गोळीबार करावा लागला. यामध्ये ४ जणांचा मृत्यू झाला.

CRPF has shot dead 4 people in Sitalkuchi (Cooch Behar) today. There was another death in the morning. CRPF is not my enemy but there’s a conspiracy going around under the instruction of Home Minister & today’s incident is a proof: West Bengal CM Mamata Banerjee pic.twitter.com/sDAdR86Zt7

— ANI (@ANI) April 10, 2021

दरम्यान, सीआरपीएफच्या गोळीबारात मृत्यू झालेले ४ जण तृणमूल काँग्रेसचे कार्यकर्ते होते असा दावा आता तृणमूलकडून केला जात आहे. तृणमूल काँग्रेसच्या सर्वेसर्वा आणि पश्चिम बंगालच्या मुख्यमंत्री ममता बॅनर्जी यांनी या घटनेचा निषेध करत भाजपावर टीका केली आहे. “सीआरपीएफने आज सितालकुची (Cooch Behar) मध्ये ४ जणांवर गोळी झाडली. सकाळी देखील एका व्यक्तीचा मृत्यू झाला. सीआरपीएफ माझी शत्रू नाही. पण गृहमंत्र्यांच्या निर्देशांवरून एक कट शिजवला जातो आहे. आणि आज घडलेली घटना त्याचा पुरावा आहे”, असं ममता बॅनर्जी म्हणाल्या आहेत.

The firing took place because common people were resisting the effort by BJP hooligans to disrupt the voting. They are being encouraged by Central Armed Police Force & we feel this is a conspiracy headed by Home Minister, we are demanding his resignation: Saugata Roy, TMC MP

— ANI (@ANI) April 10, 2021

“कूच बेहरमधील त्या मतदारसंघातले सामान्य नागरिक भाजपाच्या गुंडांना मतदानात गोंधळ घालण्यापासून अडवण्याचा प्रयत्न करत होते, म्हणून गोळीबार झाला. त्यांना केंद्रीय राखीव पोलीस दल अर्थात सीआरपीएफची फूस होती. गृहमंत्र्यांच्या निर्देशांनुसार हा कट केला जात आहे. आम्ही त्यांच्या राजीनाम्याची मागणी करत आहोत”, असा आरोप तृणमूलचे खासदार सौगता रॉय यांनी केला आहे.