वाईड बॉलवर फलंदाज कसा बाद होतो? काय आहे ICC चा ‘तो’ नियम? ज्यावरून धोनीच्या बायकोने घातलेली हुज्जत

धोनी किस्सा सांगताना म्हणाला, “आम्ही घरी बसून वनडे सामना पाहत होतो. त्यादरम्यान गोलंदाजाने चेंडू टाकला आणि तो वाईड देण्यात आला. फलंदाज तो चेंडू खेळण्यासाठी क्रीझपासून पुढे गेला आणि स्टंपिंगमुळे बाद झाला. तितक्यात साक्षी बोलायला लागली की तो आऊट नाही आहे. तर धोनी म्हणाला की वाईड चेंडूवर फलंदाज स्टंपिगमुळे बाद होऊ शकतो, फक्त नो बॉलवर बाद होऊ शकत नाही. पण साक्षीचं म्हणणं होतं की, फलंदाज आऊट नाहीय कारण तो वाईड बॉल होता. साक्षी मात्र तिचं म्हणणं पटवून देत राहिली आणि फलंदाज मैदानाबाहेर गेला.

हेही वाचा –MS Dhoni: “तुला काही माहित नाही, तू थांब…”, अन् धोनीला पत्नी साक्षी समजावत होती स्टंपिगचे नियम, नेमकं काय घडलं? पाहा VIDEO

वाईड बॉल असल्याने फलंदाज बाद नाहीय, असं साक्षीचं म्हणणं होतं. पण याबाबत आयसीसीचा नेमका नियम काय आहे, जाणून घेऊया.

वाईड बॉल असूनही फलंदाज स्टंप आऊट झाला. आयसीसीच्या नियमांनुसार, वाइड चेंडूवर फलंदाज स्टंपिंगमुळे बाद होऊ शकतो. जर तो क्रिझच्या बाहेर असेल आणि यष्टिरक्षकाने चेंडूने त्रिफळा उडवला तर अंपायरला फलंदाजाला बाद घोषित करावे लागेल.

फलंदाजी करणाऱ्या संघाची विकेटही पडेल आणि अतिरिक्त धावाही मिळतील. आयसीसीच्या या नियमानुसार वाईड चेंडू बाद झाल्याने दोन्ही संघांना फायदा होईल. फलंदाजी करणाऱ्या संघाला वाइडच्या नियमानुसार एक अतिरिक्त धावही मिळेल आणि चेंडूही मोजला जाणार नाही. तर गोलंदाजी करणाऱ्या संघाला विकेटही मिळेल. येथे दोन्ही पंचांना निर्णय द्यावा लागतो.

हेही वाचा – IPL 2025 लिलावापूर्वी किती खेळाडूंना रिटेन करता येणार? रिटेंशनचे संपूर्ण नियम वाचा एकाच क्लिकवर

गोलंदाजीच्या टोकावरील अंपायर वाइड सिग्नल करतील, तर स्ट्रायकरच्या टोकावरील पंच फलंदाज आऊट असल्याचे संकेत देतील. तर धोनीने सांगितल्याप्रमाणे चेंडू नो बॉल असल्यास फलंदाजाला स्टंपिंग करून आऊट करता येत नाही.